Ӱшанле улмыжлан кӧра пий еҥын эн сай йолташышкыже савырнен. Лудшына-влак тидын шотышто мом каласат?
Юлия Ускова, Йошкар-Ола:
– Мый инструктор-кинологлан пашам ыштем, сандене шкалам ӱшанле йолташым кычалынам. Тыге 2019 ийыште кум тылзаш бельгийский овчарке мемнан ешыш илаш куснен. Пашаште тудым Дог Драйв Ефрейтор манам гын, мӧҥгыштӧ – Макс, Максим але Мася. Пийым ашнаш налмеке, мый тудым тӱнямбал системе почеш дрессироватлаш да защитно-караульный службылан ямдылаш тӱҥалынам.
Максим мемнан дене ынде вич ий ила, йоча-шамычлан поро йолташыш, ешнан тӱҥ оролышкыжо савырнен. Тудо «мераҥ», «кушто», «кишке» трюк-влакым ыштен мошта. Икшыве-шамычым издер дене шупшын коштыкта. Моло пий семынак Максим машинаште кудалышташ, йӱштылаш, ӱстел гыч сосискым «шолышташ», мыйын сумкамым нумалаш йӧрата.
Но эн оҥай жапше тудын службышто эрта. Дог Драйв Ефрейтор тӱрлӧ выставкыште, чемпионатыште таҥаса, нормативым сдатла. Мутлан, «транспортым шымлымаш», «верым шымлымаш», «кыша почеш еҥым кычалмаш» да тулеч моло таҥасымашыште чӱчкыдын ончыл верыш лектеш. «Российын самырык чемпионжо», «РКФ-н самырык чемпионжо», «Российын чемпионжо» титулжо-влак улыт.