Икмыняр ий ончыч кеҥежым лийше ӧрыктарыше случай дене палдарынем.
Ялыште илем. Чоҥымо пашалан кид-йолем толеш. Ик эрдене ик ӱдырамаш гаражым чоҥаш полшаш йодын тольо. Мый келшышым, адакшым тиде ӱдырамаш мӱндыр родына лиеш, кузе тореш лият.
Кечыгут паша сайын кайыш. Вич пӧръеҥ улына ыле. Кас кочкыш деч вара мӧҥгӧ каяш тарванышым. Мый денем пырля пашам ыштыше ик пӧръеҥ мутланаш пиже. Кочывӱдым подылынат, йылмыже рудалтын. Кораҥын кайынем ыле, но тудлан тиде ыш келше. Кидем кучен шынден, кучедалаш пижнеже. Тидым ужын, озавате куржын тольо да «Тый мыйын племянникем молан обижатлет?!» манын, мыйым шудалаш тӱҥале. Икмыняр гана вачем гыч пералтыш. Мый кидем лупшальым да кайышым.
Тылеч вара мо лиймым пеш сайын ом шарне. Ошкедем, ошкедем. Шкеже палем: мӧҥгем шукертак миен шушаш улам. Вара шижам, пакча шеҥгелысе ерыш вургемге пурем. Ерышкыже молан пурем? Пакча йолгорно дене ошкылам гын, пӧртемже тыштакыс, шонем, но нимом ыштен ом керт – йолем мыйым ок колышт. Пычкемышалтынат шуктен. Вара шарнем, вӱдыштӧ ийын каем. Шкеже сер дек ийын лекнем гынат, ер покшекыла гына иям. Пеш ноенам, виемат кодын огыл.
Пий оптымо йӱкеш помыжалтме гай лийым. Тиде мемнан пий оптас. Кӧм опта, кӧ мемнан дене коштеш? Ончем – ер покшелне улам, шижам, теве-теве пуреҥгаем, тунар чот вием уке. Тиде татыште «Ой, Юмыжат» манын колтышым да, шӱлешт-шӱлешт, сер дек ийын лектым.
Дамбе дене ял могыр серыш миен шуым, пакча шеҥгеч мӧҥгем миен пурышым. Пелашем ок мале ыле. Мо лийме нерген тудлан каласкалышым. «Теве молан Полканна тынар оптен. Тудо йӧсланыметым шижын улмаш, шинчыр гыч мучыштарен колташ кӱлеш ыле», – мане тунам пелашем.
Вес кечын мыйым саде ӱдырамаш адак полшаш мияш йодын толын. Шкемын пашам шуко манын, тетла каен омыл. Тудын осал вий дене варналт илымыж нерген ик еҥ деч веле огыл колынам. Но полшымемлан мыланем тыге «таушта» манын шоненат омыл.
Леонид.
Звенигово район.
Интернет гыч налме фото.