Икымше июньышто 11 шагатлан рӱдыоласе Калык прикладной сымыктыш тоштерыште Галина Кокоринан «Пиалын мастаргудыжо» («Мастерская счастья») ончерже почылтеш. Мероприятий Российысе калык-влакын тӱвыра поянлыкышт идалык дене кылдалтын.
Галина Аркадьевна Кокорина 150 утла пашажым калык ончык луктеш. Кидмастар калык кидпашам да костюмым шымла. Поснак шке ыштыме курчак-влаклан тӱткышым ойыра. Г.А.Кокорина тӱрлӧ конкурс ден ончерлашке пашажым аклаш луктын.
Йочам ончымаште да туныктымаште курчак кугу верым налын шога, поснак калык йӱла да чием дене палдара. Курчакым ургымо сомыл ача-ава да йоча коклаште кылым пеҥгыдемда, — тыгерак ойла ончерын авторжо.
Ончер ик тылзе пашам ышта. Тыгак тушко толшо-влаклан курчакым ышташ посна занятий-влакым эртарат.
