Пиалдыме ӱмыр

Ола урем дене какширак капан, куптыргышо шӱргывылышан илалше ӱдырамаш ошкеда. Тӱжвач ончымаште тудлан иктаж 65-70 ийым пуаш лиеш. А чынжым гын мыняре? Кӧ пала, ала? Теве тудо киндым ужалыме киоск воктелан чарнен шогале. Янда дене комыжлымо витрине вес велне улшо акым тӱткын эскерен шогыш. Вара, кӱсенже гыч кушкедалт пытыше оксагалтам луктын, тыгыде оксам шотлаш пиже. Очыни, пытартыш оксаже. Вик коеш: шоҥго ӱдырамашлан ласка илыш пӱрен огыл. Кӱлеш наре шотлен ойырымеке, коштыргышо, кукшо кидшым шуялтыш. Вашешыже  ик сукыр шем киндым пуэн, изи окнам петырышт. Ӱдырамаш киндым сумкашкыже шуралтышат, шке корныжым умбакыже шуйыш.

Ты шоҥго ӱдырамаш – ончычсо туныктышо. Кызыт оласе тошто пӧртысӧ ик шӱкшӧ пачерыште ила. Ӱмбакше ончалат гын, тудо туныктышо лийын манын отат шоналте. А вет ала-кунам йоча-влакын пагалыме туныктышышт, ача-ава-влакын тӱҥ эҥертышышт, а шке ешлан сай пелаш, поро ава лийын. Очыни, шкежат тунам тыгай илыш нерген шоналтен огыл, моло семынак, пенсийыш лекмеке, ласка шоҥгылыкым вучен. А илыш йыжыҥан. Ала-молан чӱчкыдынак пӱрымаш сай еҥлан корно тореш тоям шуа. Тыгак лие Мария Николаевна денат.

1932 ий. Ик шыже кечын ош тӱняшке изи чумырка шочо. Павышка кува, шинчашӧржӧ дене ончалын, вик пелештыш: «Шуко илаш огеш тӱҥал. Ила гынат, пиалдыме лиеш». Шочшо азан аваже, Колю вате, икымше йочажым павышка куван тыге вашлиймыжлан чылтак ӧрӧ. Но кугурак ваштареш мом ойла? «Илена, ужына», – манын, чон падырашыжым оҥ пелен ӧндале.

Изи азалан Майрук лӱмым тушкалтышт. Юмылан тау, павышка куван «Шуко илаш огеш тӱҥал» шомакше ыш шукталт. Изи ӱдыр кечын пеҥгыдем кушкын, аважлан полышкалыше лийын. Кандаш ияш Майрукым аваже тунемаш кумылаҥден. Ӱдыр, вуйым шупшде, кажне кечын пошкудо ялысе школыш корным тошкен. Вет кушкын шумекше, туныктышо, йоча-влак коклаште лияш шонен. Но…

Умбакыже 19 мартысе номерыште лудса. Тыгак сайтысе кевытыштына налаш лиеш.

Анжела Михайлова.