Кызытсе самырык тукымын ялыште илымыже ок шу. Шочмо пыжашым коден каен, ӱдыр-рвезе-влак ола илышым ойырен налыт манме шомак Егошинмыт ешлан келшен ок тол. Анжелина ден Алексей, университетым тунем пытарымеке, коктынат шке кундемышкышт пӧртылыныт. Алексей У Торъял посёлкысо школышто физкультурым туныкта, Анжелина «1 Май» озанлыкыште пашам ышта.
Колхоз паша йоча годсек палыме
– Волгатехым тунем пытарымеке, колхозыш пашаш пуренам. Кызыт тыгай самырык еҥым чӱчкыдын от вашлий. Шукын престижный профессийым кычалыт. Мыйын гый тыгай шонымаш лийынат огыл. Тиде колхозышто кок ковам ӱмыржӧ мучко дояркылан пашам ыштен. Садлан мыят изиэм годсек Нина ковамлан фермыш полшаш коштынам. Шарнем, загонышто шогышо ушкал-влакым вӱташ поктен пурташ полшем ыле. Ончыч вольыклан посипкам ведра дене нумалыныт. Мый тудым ведралаш темен шындем, вара ковам, нумалын, ушкаллан пуэда ыле. Ачамат тиде озанлыкыштак механизаторлан пашам ышта. Йоча пагытем нерген оҥай шарнымаш-влак гына кодыныт, – каласкала А.Егошина.
Анжелина шочмо Тушнур ялже воктенысе «1 Май» озанлыкын шурно складшым кокымшо ий вуйлата. Эрдене кынелын, Ульяна ӱдырыштым йочасадыш наҥгаен кодат да Егошинмыт шке паша верышкышт вашкат. Тушнур У Торъял посёлко деч кум меҥге тораште верланен. Анжелина шке автомашинаж дене кудалыштеш. Телым паша эше шукыжак огыл, а кеҥежым ныл шагат эрденак кынелын каяш перна, а кастене южо кечынже 10-11 шагат мартеат пашаште кучалтман.
Чыла – лишнак
Алексей – Чобык ял гыч. Сӱаным ыштымекышт, ик жап тушто иленыт. Вара шке пӧртан лияш шоненыт, но келшышым муын огытылат, У Торъял посёлкышто пачерым налыныт. Чобыкышто пакчам шындат, участкым сад семын кучат.
– Олаште пачерыште илен ом керт, мыланем эрык кӱлеш. Изинек ялыште пашалан тунемын кушкынам. Вольыкым ятыр онченна. Тыгай илыш мыланем палыме да лишыл, садланак ялышкак пӧртылынам. Волгатехыште тунеммем годым Йӱдвел кундемыш пашам ышташ каяш, тушто илаш ик жап шоненам ыле. Вара тыгай шонымаш йомын. Олаште шыгыр гай чучеш, а ялыште мыланем чыла шотыштат сай. Ача-авам лишне улыт, шонымо семын машинаш шинчына да уналыкеш миен толына. Кеҥежым емыжым але поҥгым погымем шуэш – шинчам да воктенысе чодыраш кудалам, – каласкала А.Егошина.
Колын да колыштын моштат
Анжелина мотор фото-влакым ышташ йӧрата. Тидлан йолташ ӱдыржӧ дене кас але эр ӱжара годым пӱртӱс лоҥгаш лӱмын лектыт. Шурно пасушто, чодыраште – йырым-йыр ямде фотозоно. Эше самырык ава маникюр курсым тунем лектын. Яра жапше лийме годым родо-тукым да палыме ӱдыр-ӱдырамаш-влаклан моторлыкым пӧлекла. Тунемашат жапым муэш – МарГУ-со аграрно-технологический институтышто шинчымашым заочно пога.
Самырык озавате ешыжым тутло кочкыш дене сийлаш йӧрата, поснак – каныш кечылаште. Кеҥежым шке пакчаште ончен куштымо саскам банкылаш шинчалтен опта.
– Опыт жап дене погына. Ончыч авамын ыштымыжым ончем, полышкалем ыле. Шке ешан лиймеке, чыла ышташ тунемалтеш. Интернетыште рецепт-влакым онченам, тӱҥалтыште, авам дек йыҥгыртен, мо-кузем йодыштам ыле, – манеш Анжелина.
Егошинмыт 2019 ийыште сӱаным ыштеныт. Анжелина тыматле койыш шоктышан. Алексей – пайдале ой-каҥашым пуэн моштышо пелаш, ӱшанле эҥертыш. Тудо изинек спортлан шӱман кушкын, садлан койыш-шоктышыжын эше ик ойыртемже – шонен пыштыме цельыш эреак шуаш.
Егошинмыт икте-весым колыштын да умылен илат, ончыкылыклан планым ыштат. Пашашт чонлан келша, а тыгай еҥ пиалдыме лийын ок керт.
Еш альбом гыч налме фото.