Илышыште пиалым мамо, чон пелашым вашлийме деч ончыч южгунам «когаргашат» перна. Тидым Йошкар-Олаште илыше Инна ден Роман Шабалинмыт шке опытышт гыч палат. Нуно, кок сусыр чон, икмыняр ий ончыч вашлийыныт да тылеч вара, икте-весылан эҥертен, илыш корно дене пырля ошкылыныт.
Шем шинчаже чоным савырен
– Рома дене интернетысе ик соцсетьыште палыме лийынна. Эн ончыч тудо мыланем возен колтен. Икмыняр жап гыч мыят вашештенам. Варажым коктын кажне кечын манме гаяк возкаленна. Палыме лиймына годым Советский посёлкысо школышто тӱҥалтыш класслам туныктенам. А Рома Йошкар-Олаште илен, пашам ыштен. Тудын дене келшаш тӱҥалме деч ончыч мый ойырлышо лийынам, ончычсо пелашем деч кум ияш Ксюша ӱдырем дене коктын иленна. Романынат мый дечем ончыч пелашыже да йочаже лийыныт. Но ме икте-весына деч тидым шылтен огынал, иканаште луктын каласенна.
Икымше гана Советский посёлкышто паша деч вара вашлийынна. Романын шемалге-кӱрен шинчаже чонем савырен. Фотошто тидым шекланен омыл ыле, а шинчаваш ужмеке, шинчашкыже гына эре ончымем шуын. Кызытат пелашемлан чӱчкыдын икымше вашлиймашнам шарналтен ойлем, – каласкала Инна.
Сӱан деч вара – Йошкар-Олаш
Тылеч вара пӧръеҥ Инна дек посёлкыш чӱчкыдын кудалыштын. Икана кастене мӧҥгеш Йошкар-Олаш кудалмыж годым военный-влак корным петыреныт. А эрлашыжым эрденак пашаш кайыман улмаш. Инна Ромалан йыҥгыртен да манын: «Мӧҥгеш тол. Йӱдым машинаште эртарет мо? Вер чылалан сита». Иннан поро кумылжо пӧръеҥынат чонешыже логалын.
Ксюша Рома дек пеш вашке тунемын. Кумытын Йошкар-Олаш чӱчкыдын кудалыштыныт, пырля каненыт.
– Ваш-ваш уналыкеш ятыр жап коштмеке, мый Ромалан пырля илаш темленам. Йошкар-Олаште пачерым айлен илаш огыл манын, Рома посёлкыш илаш куснен. Отпусклан теҥызыш канаш мийымына годым тудо марлан лекташ темлен. 2014 ийыште сӱаным ыштенна да Йошкар-Олаш илаш кусненна, – каласкала И.Шабалина.
«Соня ӱдырна лиеш»
Кунам-гынат ӱдырна шочеш, тудлан Соня лӱмым пуэна манын, Рома пелашыжлан чӱчкыдын ойлен. Икмыняр жап гыч Инна чынжымак мӱшкыран улмыж нерген пален налын. Пӧръеҥ икымше УЗИ-м чот вучен, эрге але ӱдыр манын пален налмыже шуын. УЗИ-ш пырля каеныт, ӱдыр лийшашым пален налмекыже, Романын куанже нимучашдыме лийын.
Нелылык деч пырля утлыман
– Рома тыматле койыш-шоктышан, ӱчашымым, вурседылмым ок йӧрате. А мый южгунам бомбо гай пудешталт кертам. Икманаш, Пикшызе улам. Коктын ӱчашаш тӱҥалына гын, мыланем пургедашак, чыла рашемдаш кӱлеш. А пелашем тыгай годым шып лиеш. Тудо пала: икмыняр жап гыч мый лыпланем.
Ешым чумырымеке, ме икте-весынам шкаланна кӱлеш семын вашталташ тыршена. Тидлан кӧра ӱчашымашат, вурседылмашат чӱчкыдын лиедат, вет иктынат вашталтмыже ок шу. Мемнанат тыгакак лийын. А вара мый Ромалан каласенам: «Проблеме уло гын, шинчын кутырыман, тудым ӧрдыжкӧ шӱкалман але шылтыман огыл». Мо мыланем ок келше, мый луктын каласем. Рома тидым шотыш налеш. Тудат шке шонымыжым мыланем ойла.
Ешым чумырымылан вашке индеш ият лиеш. Тылеч вара мый шкежат чот вашталтынам. Рома дене пырля шымарак лийынам. Ончыч иктаж-могай изи амаллан сырем ыле, а кызыт шотыш ом нал, – манеш озавате.
Кызыт икшыве-влак коктынат школышто тунемыт. Вате-марийлан жапым пырля эртараш йӧн ешаралтын. Пырля иктаж-куш миен толыт, йолташышт дене вашлийыт, пӱртӱсыш лектыт.
Шонымашышт шукталтын
Ик ий ончыч Шабалинмыт Йошкар-Олаште пачерым налыныт. Тылеч ончыч илыме верым айлен иленыт. Инна ден Рома олмыктымо пашам шке вий дене эркын ыштат, мебельым наледат.
– Ятыр ий еҥын пачержым айлен иленна. Тидат коклаштына умылыдымашым луктын. Мутлан, мый пелашемлан иктаж-мом олмыкташ але арверым налаш ойлем ыле. А тудо тиде мыйын пачерем огыл, мый нимом ом ыште манын вашештен. Шке илыме веран лияш шукертсек шонен коштмо. Шонымашкына шумаш коклаштына кылым эшеат пеҥгыдемден. Мый ужам да шижам: пелашем чылажымат кумылын, шинча йӱлен ышта, – манеш Инна.
Инна – Йошкар-Оласе ик частный йочасадыште воспитатель. Рома дальнобойщиклан ышта. Тудо кум арня корнышто кудалыштеш да лу кече кана. Пелашыжын мӧҥгыштӧ улмыж годым Инналан кухньышто нимом ышташ. Рома кочкаш шолташ йӧрата. Шурпа, плов, моло кочкыш дене ешыжым сийла. Интернетыште рецепт-влакым муэш да тӱрлым ямдыла. Пӧръеҥ эше колым кучаш коштеш, поснак – телым. Йӱштыштӧ кылма да колым шагал конда гынат, мӧҥгыжӧ пиалан толын пура. Вет тиде пашаште, кузе колызо-влак шкешт ойлат, кол огыл, колым кучымо процессше куаным конда.
Еш альбом гыч налме фото.