Советский район Ӱшнур кыдалаш школышто «Артек» тӱнямбал йоча рӱдерыш миен толшо-влакат тунемыт. Нуно тушто кодшо ий декабрьыште лийыныт, тидын нерген кызытат куанен каласкалат.
Нылытын
«Артекыште» ныл ӱдыр лийын. Ты лагерьыш чыланат икымше гана логалыныт. Тений Мария Рыбакова ден Мария Ягодарова 10-шо классыште тунемыт, Лиана Петрова ден Валентина Волкова – 11-ше классыште. Нине тунемше-влак финансовый грамотность да предпринимательстве шотышто Россий чемпионатыште кумшо верым налыныт ыле.
Ялысе команде-влак кокла гыч Ӱшнур школ гыч веле лийыныт, молышт кугу олала гыч толыныт. Нунышт моткоч виян улыт, сандене Марий Эл гыч ӱдыр-шамыч шуко ум пален налыныт.
Ӱдыр-влак социально-экономический направлений дене тунемыт. Ӱшнур школышто «Финанс грамотность» кружокыш икымше ий коштмышт годымак чемпионатыш логал кертмышт куандара. А вес команде-шамыч ты направлений дене кум ий шинчымашым погеныт. Кружокым обществознаний ден экономикым туныктышо Елена Васильевна Кислякова вуйлата.
Елена Васильевна «Артекыш» пырля каен огыл гынат, кажне кечын тунемшыже-влак дене видеосвязь йӧн дене кылым ыштен, ой-каҥашым пуэден, йодыш-влаклан вашмутым лончыленыт.
Мотор лӱман
Ик чолга марий ӱдыржӧ – Лиана Петрова – ятыр мероприятийыш ушна, школын, районын чапшым арала. Ты школышко тудо 5-ше классыште толын да кызытат куанен коштеш. Тений кеҥежым Марий самырык тукым слётышто лийын. Ты районысо Изи Ашламаш ялыште ила.
– Мемнам «Артекыште» чемпионатын суперфиналышкыже ӱжыныт. Командыштына кудытын улына, но тушко нылытын миенна. Кажне кечын посна график почеш шуко мероприятий эртаралтын, тыгак вес кечылан йӱд мучко ямдылалташ кӱлын. Кум направлений дене модмаш-влак лийыныт: финанс грамотность, коммуникативный да бизнес кучедалмаш-влак, – шарналтыш вашлийме годым Лиана Петрова.
Мом ышташ келша?
Тиде йодышым пуымеке, Лиана тыгерак вашештыш:
– Кызыт ЕГЭ-лан ямдылалтам, яра жапем шагалрак. Туге гынат сӱретлаш, поделкым ышташ келша. Школышто «Финанс грамотность» деч посна «Драматический» ден «Куштымаш» кружоклашке коштам.
А мӧҥгыштӧ чӱчкыдынак кочкаш шолтем. Ешна изижак огыл: ныл йоча улына, кумытынжо школышко коштына. Утларакшым шӱрым шолтем. Когыльым уло кумылын кӱэштам, десерт-влакым ыштылам.
Вашке Лианалан школ дене чеверласаш логалеш. Тудо Волгатехыш тунемаш пурымо нерген шонкала.