Шукерте огыл муро тӱням Интернет гоч эскерыше-влак у муро да у лӱм дене палыме лийыч. Виктория Попован «Пиалан улам» мурыж нерген еҥ-влак ятыр поро ойым возат, эсогыл ӱдыр деч эше у муро-влакым йодшо-шамычат улыт. Тидыже мемнам Вика дене лишкырак палыме лияш таратыш.
Тӱрлӧ семӱзгар дене шоктышо, мураш, почеламутым возаш, семым шонаш, сӱретлаш йӧратыше ӱдыр, уста туныктышо – чыла тиде Шернур кундем Шӱдымарий ялын шочшыжо Виктория Попова нерген.
Муро тӱняш корно
– Изи годсек артист койышан лийынам. Йочасадыш коштмо годымат, школ пагытыштат мураш, кушташ, почеламутым лудаш чот йӧратенам. 4-ше класс марте Шӱдымарий школышто тунемынам. Икана авам Йошкар-Оласе национальный президент школ-интернат нерген мутым луктын. Мый тунамак тушко тунемаш пурашак шонен пыштенам.
5-ше классыш 2-3 вер гына лийын, сандене пурен керташак манын, экзамен годым кузе чот муренам! Йӱкемже уло школымат шергылтарен, очыни. Кузе чот куштенам, чыла моштымемым ончыкташак тыршенам. Мый эше сӱретлаш йӧратенам. Сандене художественный направлений денат экзаменым кучена, – шарналтен ойлыш Виктория.
Арня гыч ӱдырын мӧҥгышкыжӧ кок серыш толын: иктыште музыкальный направлений дене, весыште сӱретчылан тунемаш ӱжыныт. Виктория музыкым ойырен налын. Тыге 5-ше класс гыч у школыш вончен, домр дене шокташ тунемаш тӱҥалын.
Школ шуарен
Ӱдырын ойлымыж почеш, школ-интернатыште тунемме пагыт моткоч пайдале лийын. Тыште ӱдыр чулым, тӱрлӧ вере шкенжым вияҥдаш тыршен, республикысе, российысе да тӱнямбалысе конкурслаште таҥасен. Музыкант семын веле огыл, сӱретче семынат. Тудын сӱретше, мутлан, 2012 ийыште Германийыште эртаралтше тӱнямбал йоча сӱрет конкурсышто финалыш логалын. Шкеж нерген ӱдыр тыгерак мане:
– Илышыште ик эн тӱҥ койыш – шкалан ӱшанен, чылажымат шкеак, кыртмен пижын ыштымаш. Мый лач тыгай улам. Сандене лӱдын ом шого. Весе – пашам йӧратыме кумыл. Сайын тунемаш манын, эрдене эрак (иктаж 5 шагатлан) кынелын, уроклан ямдылалтам ыле. Кызытат його омыл. Тыгак чыла шот дене, сай лийже манын ышташ йӧратем. Тыгай койышым мылам школ-интернат пуэн.
Колледжыште
Музыкальный школым тунем лекмеке, Виктория И.С.Палантай лӱмеш тӱвыра ден сымыктыш колледжыш тунемаш пурен, академический музык факультетым ойырен налын, тыштат домр дене шоктен, струнан моло семӱзгар дене шокташ тунемын. Ӱдыр сайын тунемын, студент-влак кокласе кеч-могай усталык пашашке уло кумылын ушнен.
Туныкташ пӱралтын
В.Попова колледж деч вара «Лира» сымыктыш школышто пашам ышташ тӱҥалын. Кызытат тыштак йоча-влакым домр, укулеле, балалайке да гитар дене шокташ туныкта. Тылеч посна Йошкар-Оласе 26-шо номеран гимназийыште 5-8-ше класслаште музык урокым эртара.
– Туныктышем Валентина Сергеевна Виноградова мылам эре ойла ыле: «Тунемын туныктышо огыт лий, туныктышо шочыт. Тиде тыйын нерген…» Тудын ойжо туныктымо корным ойырен налаш кумылаҥден. Йоча-влак дене пырля мый илышым у семын ужаш тӱҥалынам. Нунын ончылно шогымем годым, мом палымемым каласкалымем годым, нунын йывыртыше шинчаштым ужын, кумылым нӧлтышӧ, пашам ышташ таратыше, эрласе кечылан ӱшаным пуышо вий-куатым шижам. Мый ты пашаште вӱдыштӧ кол модмо семынак илем, куанем да пиалан улам, – ойла Вика.
Икымше муро
«Пиалан улам» – Викториян икымше мурыжо. Тудым ямдылымыж нерген ача-аваже, йолташыже-влакат пален огытыл. Такшым муро шотышто шонымашыже эре лийын. Мурын лӱмжым колледжым тунем лекмек, пашам ышташ тӱҥалмекак шонен луктын. Тунам илышлан куанымым, чонышто ласкалыкым шижын. Варажым мурын шонымашыже изишак вашталтын, но лӱмжӧ кодын.
– Мутым йолташ ӱдырем Наташа Петухова дене пырля возенна. Икымше куплет мыйын, кокымшо – тудын. Семым гитар дене шке шоненам, вара аранжировщик Евгений Бахтинлан пуэнам, но тудо припевыште икмыняр вашталтышым пуртен, сандене семын авторжо семын тудо возалтын…
Шкемым мурызылан ом шотло, но муро могай лийшашым шижам, колам, палем. Вес еҥым йодман огыл, шкемын музыкант-влак командем лиеш гын, мурым уэмдаш да тӧрлаш йӧн лиеш ыле, но мемнан республикыште ты шотышто нелырак, шонем. Кеч-мо гынат, мурем ош тӱням ужын. Мылам тиде – пайдале опыт. Усталык пашам еҥ-шамычлан келшен. Мый кажне ойдам да тыланымашдам лудам, поро кумылдам шижам. Кажнылан чон почын тауштем. Ончыкыжым у сай мурым пӧлеклаш манын тыршаш тӱҥалам, – мане Вика.
Илыш нерген шонкалымаш…
– Поро кумылан айдеме йыр порылык лиеш, а осал осалым «шупшеш». Мый тидлан ӱшанем. Чонышто эре порылык, куан лийшаш улыт. Волгыдо кумыл дене, шыргыжын илыман. Тунам веле айдеме ден айдеме пырля пиалым шижын илаш тӱҥалыт, – ойла Виктория.