Ӱпетым ит локтыл!

Ӱпым эскерет, шотыш кондет гын, тудо эре мотор лиеш. Ӱплан могай маскым кучылтман? Кызыт могай причёско модныйлан шотлалтеш? Тиде да моло йодышлан Йошкар-Олаште «Анна» парикмахерскийыште парихмакерлан пашам ыштыше Тамара Вячеславовна Смирнова дене мутланышым.

Тамара Вячеславовна Смирнова Морко район Канторъялеш шочын-кушкын. 2004 ий годсек парикмахерлан пашам ышта.

– Тамара Вячеславовна, ӱпым кузе эскерыман? Арняш мыняр гана мушман?

– Кажне еҥын ӱпшӧ тӱрлӧ: иктын – чот ӱян, весын – кукшо. Сандене ӱпын структурыжылан келшен толшо шампуньым гына налман. Ӱпым вӱдыжтараш тӱрлӧ маскым кучылташ лиеш. Тыге ыштен, ӱп ешартыш кочкышым (питанийым) налеш.

Ӱпым шуэнрак мушкаш тыршыман. Чӱчкыдын мушмылан ӱп тунемеш, вашке лавырга, ӱяҥеш.

Шампунь дене гына мушкат гын, ӱп кукшо лиеш. Сандене мушмо деч вара бальзамым йыгаш тыршыза. Варажым вӱд дене шӱалтыза. Тунам ӱп сайын шералтеш да моторын йылгыжеш. Тӱрлӧ шудо вӱд дене шӱалташ пайдале. Ошалге ӱпан-влаклан висвис пеледыш лем дене шӱалташ темлем, шем ӱпан-влаклан куэ выньыкын вӱдшӧ сай.

– Ӱп йогымо годым мом ыштыман?

– Тидын шотышто шуко амал уло. Айдеме иктаж чер дене орланыме годым тыгай нелылыкыш логалеш. Поснак щитовидный ту чер годым ӱп чот йога. Коронавирус деч вара эмлалт лекше-влакат тыгай азапыш логалыт. Тиддеч вара ӱп пеш эркын кушкеш. Стресслан, айдемын чот ойгырымыжлан кӧра ӱп йога. Сандене шкем ласкан кучаш тыршыман. Сай огыл экологий да уда кочкыш тидын шотышто кугу рольым модыт.

Ӱп йогаш тӱҥалмеке, эн ончыч врач деке миен толза, тергалтса. Чот ойгырышо-влаклан изиш ласканрак илаш тунемман.