4-5 июльышто Мордовий Республикын рӱдолаштыже, Саранскыште, Лидерстве национальный школ эртен. Тушко Марий Элын делегацийже дене пырля Йошкар-Олаште илыше самырык мурызо Данила Коротков миен коштын.
Пайдалын эртен
Саранск олаш элнан 26 регионжо гыч 200 финн-угор лидер ушнен. Кок кечыште участник-шамычлан лӱмлӧ эксперт-влак тренингым, вашлиймашым эртареныт.
Тренинг ден семинар-влак калык-влак кокласе кылым арален кодаш да пеҥгыдемдаш полшат. Тыгак тиде шотышто шочмо йылмын верже, самырык-шамычым уда тӱшкаш ушнымо деч аралымаш, IT-технологий полшымо дене тӱвырам вияҥдымаш теме-влак рӱдӧ верым налыныт.
– Марий тӱвыра рӱдерын вуйлатышыже Василий Петров ты школыш каяш темлен. Тидлан анкетым да эссем возен колташ кӱлын. Марий Эл гыч9 еҥ: Александр Ямбаев, Максим Алгайкин, Мария Акулова, Никита Козлов, Кристина Краснова, Анастасия Лазарева, Анастасия Муравьева, Елена Валериановна Григорьева да мый миен коштынна.
Школышто чыла участникым ныл тӱшкалан шелыныт да кажне тӱшкаште тӱрлӧ спикер выступатлен.
Икымше кечын концерт лийын. Тушто тӱрлӧ кундем гыч толшо ӱдыр-рвезе-влак кок мурым мурышаш улыт ыле. Но Марий Эл ойыртемалтын, ме ныл номерым ончыктенна. Никита Козлов, Кристина Краснова да мый «Йӱржӧ йӱреш» мурым йоҥгалтаренна, вара мый «Кумылым шылтен ом мошто» мурым муренам, тыгак Кристина – акапельно ик мурым да Никита Козлов «У-ХА» такмакым, – палемда рвезе.
Ты школышто республикнан делегацийже марий муро ден такмакым йоҥгалтарен, шуко куштен. Тыге участник-влакын кумылыштым марий тӱвыра деке савырен. Никита Козловын гармоньым шоктымыж почеш финн-угор ӱдыр-рвезе-шамыч йыр куштеныт.
– Поснак Хант-Мансий да Удмуртий кундемла гыч участник-влак дене пеҥгыде кылым ыштенна. Мӧҥгына пӧртылмӧ кечын у йолташ-влакым вокзал марте марий муро почеш ужатенна. Нуно мемнан южо мурынам паленыт, пырля мурашат тыршеныт. Тидыже утларак кумылым нӧлтен.
Лидерстве национальный школышто вес кундем гыч у еҥ-шамыч дене палыме лийынам, у шинчымашым налынам, шочмо кундемын, калыкын ойыртемже нерген каласкаленам. Икманаш, жапым пайдалын да веселан эртаренам, – ойла Д.Коротков.
Усталык шӱлышан
Рвезын мастарлыкше тӱрлӧ шӧрыныштӧ палдырна. Данила Кӱшыл политехник колледжыште программистлан 3-шо курсышто тунемеш. Тыгак Марий тӱвыра рӱдерыште методистлан пашам ышта да вокал ансамбльыш коштеш.
– Мый изинек мураш йӧратем. Тӱрлӧ конкурсыш, мероприятийыш чолган ушнем. Мутлан, пытартыш гана «iВолга-2023» федеральный форумышто лийынам. Тушто 88 регион гыч участник-влак миеныт. Форумышто «Кушто, кушто, куштымаш» мурым муренам.
Кызыт Богдана шӱжарем дене пырля «Юкече» йоча вокал ансамбльыш коштына. Вуйлатышына Светлана Альбертовна Яндукова чын мураш туныкта, тӱрлӧ пайдале упражнений-влакым ыштыкта, – каласкала Данила.
Палемден кодыман, рвезе аваж дене пырля рэпым воза. Марий мурын савыртышышкыже, яра вер кодеш гын, рэпым ешарат. Тыге муро путырак оҥайын да сылнын шокта.