Российысе «Университетские смены» программе ӱдыр-рвезе-шамычлан ойырен налме профессийыште шкем тергаш, студент илыш нерген пален налаш, у йолташым муаш полша. Йошкар-Ола гыч Анастасия Никифороват ты проектыш ушнен – тудо Пермьысе Политехыште лийын.
Чыла вере шукта
Настя А.С.Пушкин лӱмеш 4-ше №-ан гимназийыште 9-ше классыш вончен. Тудлан утларакшым точный манме науко-влак келшат: математике, физике, химий да информатике. Ончыкыжым шке илышыжым ӱдыр инженерий да инновационный технологий-влак дене кылдынеже. Тунемме деч посна Настя тыгак – «Движение Первых» толкынын да «Великолепный лес» школ лесничествын активистше, эковолонтёр, «Я исследователь» ушемын тунемшыже, Эколого-биологический йоча рӱдерын активистше.
Ӱдыр изинек чулым кушкын, пӱртӱсым йӧратымыже – ача-аваж деч. Эколого-биологический йоча рӱдерыште ешартыш шинчымашым пуышо педагог Е.В.Чулкова Настян икымше наставникше лийын – лач тудо ӱдырлан экологий дене проект ден шымлыме паша-влакым возаш темлен.
Конкурслан икымше проектшым 9 ияшак ямдылен. 6-шо классыште тунеммыж годым проект паша тудым эшеат чот авалтен. Ик эн кугулан «Экомаршрут вдоль реки Малая Кокшага «Будь в движении!» проектым шотлыман, тудын дене республикысе ятыр конкурсышто ончыл верыш лектын, тыгак «Время Побед!» республикысе премийым налын. варарак Настя «Движение Первых» толкыныш ушнен, школ лесничестве нерген пален налын, моло мероприятийыште кумылын участвоватлен.
– Школ лесничестве дене республикысе да регион-влак кокласе слётлаште участвоватлена, волонтёр семынат тыршена. «Движение Первых» толкынын мероприятийлаш ушнен, ӱмаште конкурс отборым эртенам да республикна гыч шкетын «Машук» сменыш логалынам ыле. А тений Руш географический обществын тӱнямбал профильный сменышкыже «Океан» йоча рӱдерыш миенам, тушкат конкурсым эртыман ыле. Тыге Мӱндыр Эрвелыште Япон теҥыз воктене каненам. Тушко 14 эл гыч мийыше ӱдыр-рвезе-шамыч дене палыме лийынам, Руш географический обществын специалистше-влак дене вашлийынам, мастер-классым эртаренам, – каласкала А.Никифорова.
Студент лийын ончен
«Университетские смены» проект нерген Настя ӱмаште пален налын, но йодмашым пуаш вараш кодын ыле. Тений ӱдыр шкенжым у направленийыште – инженерныйыште – терген ончаш шонен.
– Пермьысе национальный шымлыше политехнический университетыш каем манын пален налмеке, моткоч куаненам. Смене 5-15 августышто лийын. Мыланна пеш оҥай программым ямдыленыт. Пермь олан архитектуржо да мотор верлаж нерген шуко каласкаленыт. Тоштер ден предприятийлаш коштыктеныт, воктенысе Соликамск олашкат мийыме. Университетыште мыланна экскурсий лийын, ме шкенам тӱрлӧ профессийыште терген онченна, лекций-влакым колыштынна.
Тӱҥ программе деч посна моло мероприятийышкат ушненна. Шкенам лидер семын ончыктенна, сценке-влакым шынденна, мурен-куштенна, икманаш, студент илышым иленна. А мыняр у йолташым муынам! Ты проект моткоч оҥай да кӱлешан, – каласкала Анастасия.
Ӱдыр шкенжым технический направленийыште шуарынеже. Ончылно – у тунемме ий, экзамен-влак. Туге гынат конкурс да моло мероприятийланат жапым муам, манеш Настя.
А.Никифорован альбомжо гыч налме фото.