Пытартыш жапыште Пермь кундемыште илыше марий-влакым эшеат шукырак мероприятийыш ӱжаш тӱҥалыныт. Шкештат тӱрлӧ пайремым эртарат.
Пеледыш пайрем
Пермь кундемыште Пеледыш пайрем кажне ийын эртаралтеш. Тений тудо 13 июньышто Суксун район Кызганде ялыште лийын. Тудым марий-влакын районысо автономийышт (вуйлатышыже – Надежда Саватеевна Спиридонова) да Кызгандысе кыдалаш школ эртараш полшеныт. Тушко йоча-шамычым эре ушат. Вет марий тӱвырам лач нунылан ончыктен, туныктен кодыман.
«Шке самовар дене»
Марий-влакын ушнымо вес мероприятий – Суксун посёлкын кечыже. Тений тудым «Суксун калык – шке самоварже дене» манын лӱмденыт.
Ты пайремыш руш, марий да татар-влакын автономийышт ушненыт. Марий-шамыч тушко шке калык кочкышышт дене миеныт. А Кызганде ялыште шочшо да кызыт Пермь олаште илыше воспитатель Валентина Панькова курчак-аралтышым ышташ туныктен.
Фестиваль
5-6 июльышто Пермь олан рӱдыштӧ «Обряды. Наряды» фестиваль эртен. Участник ден уна-влаклан моткоч кугу программе темлалтын. Нуно тӱрлӧ темылан лекцийым колышт кертыныт, тӱрлӧ калыкын выступленийыштым онченыт.
А мастер-классше могай гына лийын огыл?! Мастар кидан еҥ-влак йолчиемыш таганым шындаш, пидаш, куанш, пум пӱчкедаш да моло кӱлешан сомылланат туныктеныт.
Пермь оласе марий-влак миеныт. Нуно марий тӱвыран моторлыкшым ончыкташ тӱрлӧ сынан марий мургемыи чиеныт, муреныт да куштеныт. Пермь крайысе Кунгур ола гыч Зинаида Шевцова бисер дене герданым (оҥыш сакыме сӧрастарыш), алгам, вуйчиемым ышта. Ты мероприятийыште тудо бисер дене пайдаланаш туныктен.
Марий кудым почыныт
12 июльышто Пермь ола деч тораште огыл верланыше «Хохловка» архитектурно-этнографический тоштерыште «Цветьё» фестивальыш марий калык куанен миен. Вет тушто марий кудым торжественно почыныт.
Пермь кундем гыч «Эр ӱжара» ден «Аршаш» марий коллектив-влак шке сылне номерлашт дене куандареныт.
Каласыман: ты кудым Суксун район Олык ял гыч конденыт. Тудым тӧрлатеныт да уэмденыт. Ош Виче кундемын кечывалвелныже шындыме пӧртыштӧ кресаньык Иликай Ильин илен. Тудым иктаж 1897 ийыште чоҥымо. Сурт-печыште пырня гыч ыштыме пӧрт, пӧртӧнчыл, амбар да моло оралте улыт. Комдык почмо капка аралалтын огыл, сандене ты верым висен, чертёж дене ыштыме.
А В.Панькова марий орнамент шотышто мастер-классым эртарен. Тушто чыла кумылан икшыве марий узоран пазлым поген, закладкым сӱретленыт. Тыгак З.Шевцова бисер дене арверым ышташ кумылаҥден.
Икманаш, Пермьысе марий-влак чолгаракын тӱрлӧ вере ушнат.
Эльвира Терентьева.