9 августышто Пермьыште пашазе молодёжьлан келыштаралтше Юл кундем федеральный округын «МолоТ» у проектшын финалжым мучашлыме. Тушто Россий Президент пеленысе Юл кундем федеральный округын полномочный представительже Игорь Комаров да Пермь крайын губенаторжо Дмитрий Махонин лийыныт.
Тылеч ончыч И.Комаров ты кундемыште Советын заседанийжым эртарен. Тушто пашазе молодёжьлан тӱрлӧ семын полшаш лийме шотышто каҥашеныт. Тудын ойлымыж почеш, кызытсе молодёжь мобильный улмыж дене ойыртемалтеш. Садлан ты койышышт самырык-шамычлан пайдам конден кертше манын, икмыняр йодышлан тӱткышым ойырыман. Пашам ышташ кумылаҥдыме, сай пашадарым налаш лийме нерген умылтарыман. Юл кундем округысо регионлаште ялозанлык да промышленность виян. Тӱрлӧ йӧнлан эҥертен, уто-ситыдымашым тӧрлен, самырык-шамычым предприятийлашке пашам ышташ толаш кумылаҥдыман. Тидланже предприятийлаште молодёжный совет-влакым ыштыман да йодыш-шамычым пырля рашемдыман, маныныт.
Палемдыман, ятыр регионлаште тыгай совет-влак пашам ыштат. Нуно шуко предприятий дене кылым кучат. Самырык-влакым патриотический, профориентационный, усталык да спорт йыжыҥлаште шуарат.
«МолоТ» проект икымше гана эртаралтын. Финалыш Юл кундем округысо 14 регион гыч 420 участник логалын, а ойырымо йыжыҥыште 16 тӱжем наре еҥ участвоватлен. 16 гыч 35 ияш самырык специалист-шамыч лийыныт. Тылеч посна мероприятийыш изи йочан ятыр еш ушнен. Шке округысо йыжыҥыштышт таҥасыме годым спортышто, усталыкыште да уш-акылым ончыктымаште вийыштым тергеныт. Финалыште – полосам тӱрлӧ чарак гоч эртымаште, пневматический саргурал дене лӱйкалымаште, гранатым кышкымаште, медицине полышым пуымаште да военный подготовкылан келыштаралтше моло ӱчашымашыште таҥасеныт. Команде дене икымше верыш Удмуртий республик лектын, кокымшо – Самара область, кумшо – Пермь край.
«Молодёжь Марий Эл» ВК-се лаштык гыч налме фото.