Россий Пенсий фондын Марий Элысе пӧлкажын специалистше-влак ӱдыр-рвезе-влакын пенсий, финанс, социальный грамотность шотышто шинчымашыштым келгемдат.
Тыгай информационный кампанийым 2011 ий годсек эртарат. Пенсий фонд ты пашалан «Все о будущей пенсии» тунемме пособийым лӱмынак ямдыла да савыкта. Тыгай кампаний идалык мучаш марте шуйна. Специалист-влак республикысе колледжлаште, вузлаште, чыла районысо школлаште пенсий теме дене кылдалтше урок-влакым эртарат, лекцийым лудыт.
Ӱдыр-рвезе-влак Российыште пенсий системын ыштылтме историйже, кызытсе жапысе пенсий законодательстве, ончыкылык пенсийын кугытшын кузе вашталт кертмыже, пенсийыш страховой взносым кузе кучен кодымо, «ош» пашадарым налме да моло нерген пален налын кертыт.
Пенсий грамотность шотышто икымше урокым Россий Пенсий фондын Марий Эл Республикысе пӧлкажым вуйлатышын алмаштышыже Игорь Захаров Йошкар-Оласе 11-ше №-ан лицейыште тунемше-влаклан эртарен. Нунылан экскурсий лийын, инфомат дене палымым ыштыме, тыгак клиентский службын цифровой зоныжын пашам кузе ыштымыж нерген палдарыме.