12 августышто Марий Элым Вуйлатыше Юрий Зайцев совещанийым эртарен. Тушто тений пелийыште кугыжаныш программе, национальный проект, республикым социально-экономически вияҥдыме индивидуальный программым илышыш шыҥдарыме пашам иктешленыт.
Республикым вияҥдыме индивидуальный программе ӱмаште сай лектышым ончыктен. Республикым 2030 ий марте социально-экономически вияҥдыме у программе тений пашам ышташ тӱҥалын.
– Россий Президент Владимир Путинын инициативыжлан кӧра мемнан регионна ешартыш полышым налын. Марий Элым социально-экономически вияҥдыме индивидуальный программе ялозанлык продукцийым шукемдаш, промышленность ден туризмым вияҥдаш полша, – ойлен республикым Вуйлатыше.
Промышленность, экономикым вияҥдыме да торговльо министр Владимир Халюзинын мутшо почеш, Промышленностьым вияҥдыме республикысе фондышто докапитализаций, Инвестиционный вияҥдыме фондышто капитализаций ышталтыныт. Ялозанлык сатум ыштен лукшо производство-влаклан субсидийым пуымо. Тачысе кечылан тидлан 850 млн наре теҥгем (планын 100%) ойырымо.
Инвестиционный проект-влакым илышыш пуртышо организаций-шамычлан 8 льготный займым пуымо, ялозанлык сатум ыштен лукшо 11 производствылан – субсидийым. Палемдыме проект-влаклан келшышын, 400 млн наре теҥге внебюджетный инвестицийым кондымо, 10 паша верым ямдылыме.
Индивидуальный программылан келшышын, туризмым вияҥдыме шотышто контрактым ыштыме. Тудын почеш Юрино посёлкышто пассажир-влаклан причалым чоҥымо да монтажым ыштыме пашам шуктат. Причал 2027 ий декабрьыште пашам ышташ тӱҥалшаш.
Марий Элым Вуйлатышын пресс-службыжын фотожо.