Школышто тунемме да студент улмем годым кажне кеҥеж каникуллан коча-ковам дек ола гыч ялыш кудалыштам ыле. Кочам дене коктын колым кучаш, поҥгым погаш коштынна, тӱрлӧ сомылым коктынак ыштенна. Кочам мыйым шукылан туныктен. Тидлан ынде ятыр ий эртен, тудо шукертак илыш дене чеверласен.
Кочам йол корштымо дене орланен. Колымыж деч икмыняр кече ончыч эмлымверыште киен. Ковам кажне кечын гаяк тудын дек кудалыштын, мӧҥгысӧ кочкышым намиен.
Тунамак ковам ӧрыктарыше омым ужын, каласкалымыжым кызытат сайын шарнем. Пуйто кочам дене коктын телевизорым ончен шинченыт. Ала-кӧ омсам тӱкалтен. Ковам омсам почын, ваштарешыже шем вургеман ӱдырамаш шоген, кидыштыже пеледыш атым кучен. Саде ӱдырамаш шемалге тӱсан кушкылым ковамлан шуялтен да «Тидым кусарен шындаш кӱлеш» манын. Молан манын йодмылан саде ӱдырамаш нимом вашештен огыл. «Тыгай кушкылым пӧртыштем ынем кушто, мотор огыл» манмылан уна сырен веле. «Тый тиде кушкылым кусарен шындышаш улат!» – манын да ковамлан атым тушкалтенак пуынеже улмаш. Тиде жапыште кочам, «Люда! Люда!» манын, омса дек куржын толын. Саде пеледыш атым шем вургеман ӱдырамашлан мӧҥгеш шӱкалын да омсам тӱкылен.
Икмыняр жап гыч ковамлан эмлымвер гыч йыҥгыртеныт да кочамын колымыж нерген увертареныт. Колымыж деч ончыч тудо «Люда! Люда» манын кычкырен улмаш.
Омышто кончымо семынак кочам пеледыш ате дене пырля осалым шке ӱмбакыже налын? Тогдаяш гына кодеш.
Е.Смирнов. Волжск.
Интернет гыч налме фото.