Тений Пеледыш пайремым икымше гана эртарымылан 100 ий теме гынат, ны яллаште да районлаште, ны Йошкар-Олаште тудо ыш лий. Ты гана Пеледыш пайремым, тыгак Семыкым южо вере онлайн йӧн дене эртарышт, тӱрлӧ соцсетьлашке, сайтлашке ондакысе ийлаште лийше мероприятийла гыч фотосӱретым шындыльыч.
Теве Звенигово районышто Пеледыш пайрем лӱмеш «Пеледышлан – пеледыш» онлайн-конкурсым увертареныт ыле.
Тушто мотор ӱдыр але ӱдырамаш-влак кум номинацийыште участвоватленыт. Чынжымак, чыланат пеледыш дечат мотор улыт.
Конкурсыш «Пеледыш чурий» номинацийыште пеледыш образыште сӧрал фотографийым ыштен колтыман улмаш. Кокымшыжым флорист-влакын конкурсышт манаш лиеш. Тыгак участник-влаклан видеороликым войзаш кӱлын.
Тиде конкурсышто кажне номинацийым посна акленыт. 17 участниклан тӱрлӧ номинаций дене дипломым кучыктеныт.
«Флорист» номинацийыште Гран-прим да ончышо-влакын призыштым Звенигово район Какшамарий тӱвыра пӧртым вуйлатыше Надежда Яндова (снимкыште) сулен налын. Тыгак тудлан «Пеледыш чурий» номинацийыште икымше степенян дипломым да ончышо-влакын призыштым пуэныт. Надеждан темлыме видеороликше «Эн сай видеосюжет» номинацийыште сеҥышыш лектын.
Ончалза тудын фотографийже-влакым. А видеороликым ончетат, каплан копыж чучеш, тусо мурен-куштымаш марий улмет дене кугешнаш тарата. Икманаш, Надежда Яндован темлыме пашаже-влак чынже денак ойыртемалтше улыт, а вуйлатыме сомыжо тӱвыргӧ.
Н.Яндован пеледыш композицийже.