Российыште Торговльо пашаеҥ-влакын кечышт июльын нылымше шуматкечынже палемдалтеш. Ты аланыште тыршыше еҥ-влакын пашашт пеш кӱлешан, вет кажне кечын кевытыш я ик, я вес сатулан коштына. Торговльо пашаеҥ-влакым профессионал пайремышт дене шокшын саламлена! Тӱвыргӧ паша лектышым тыланена! Кужэҥер район Изи Лаждӱр ялыште шочын-кушшо Диана Березина «Диана» пеледыш салоным куд ий ончыч почын. Тудо шкежак пеледыш аршашым сӧрастара да ужала.
– Студент пагыт годым мыланем пеледыш салонышто пашам ышташ темленыт. Вуйлатыше кузе да могай пеледыш аршашым погаш умылтарен, туныктен шоген. Ик жап гыч тушеч каенам. Тетла нигунам пеледыш дене пашам ышташ ом тӱҥал манын шоненам. Пӱрымаш вес семын савыралын. Кок тылзе гыч ик сайтыште пеледыш бизнесым ужалымым ужынам да налынам. Ты годсек пашам ыштем, – палдарыш салоным вуйлатыше.
Диана пеледыш аршашым погаш пашаште гына тунемын гынат, композиций-влак чынжымак сӧрал, кумылым нӧлтышӧ улыт. Ӱдыр кажне еҥын йодмыжым шукташ тырша.
Поснак кызыт пандемийлан кӧра пеледыш аршашым Интернет денат заказатлат, тыглаят йодын толшо-влак улыт. Заказатлыше-влак тышке налаш толыт але нунылан намиен пуат. Мутлан, олаште намиен пуаш 150 теҥгем тӱлыман, районлаш наҥгайыме годым торалыкым шотыш налыт. Мутлан, Советский районыш 500 теҥгелан намиен пуат.
Салонышто тыглай пеледыш аршаш деч посна кампеткан да кочкыш-сиян композиций, тыгак оръеҥлан аршашым ямдылат. Икманаш, айдемын кумылжым да йодмашыжым шотыш налыт.
Дианалан Алина ӱдыржат полышкала. Аважын ыштыме пашажым эскера, тунемеш. Южгунам пеледышым тудат ужален колта. «Кушкын шуын, Алина полышкалаш тӱҥалеш манын ӱшанем. Кӧ пала, ала кугурак салонымат почына», – каласыш Диана.