Диана Мамаева, Кужэҥер район Кугу Регеж:
– Шошо – идалыкын чевер жапше. Уремыште левырак игече шогымо дене пӱртӱс вашталтме койынак шижалтеш. Такшым шошым йӧраташ амалжат ятыр. Иктыже – пакчасе сомыл. Мый пеледышым шындаш да тудым ончен-кушташ моткоч йӧратем. Кӧршӧкыштат шуко пеледышым куштем. Шошымсо пеледыш-влак кокла гыч чонемлан тюльпан утларак келша. Нуно ныжылге, тӱрлӧ тӱсан улыт, но йошкар тӱсан пеледыш чотрак куандара. Ты тӱсым эше йӧратымашын тӱсшӧ маныт. Тыгак сирень, роза, лилия, хризантема пеледыш-шамычым йӧратем. Сирень пеледме годым, аршашым поген, вазыш шындем. Тудо пӧртлан ямым пурта. Такшым кеч-могай пеледыш кумылым нӧлта.