Тений апрель мучаште Воронеж олаште «Регионы туризма и гостеприимства» Россий кӱкшытан IV премийын финалже эртаралтын. Тушко элнан 42 регионысо 67 ола гыч ты отрасльын 200 наре специалистше ушнен. Беларусь гычат уна-влак лийыныт. А Марий Эл гыч делегаций шке усталык номерже дене чылаштым ӧрыктарен.
Кок «Шып Лий»: кугу да изи
Республикнан усталык коллективше ты конкурсыш Пеледыш пайремын презентацийжым ямдылен. Семӱзгар дене шоктымаш, весела куштымаш, Марий кундемын моторлыкшым почын пуышо видеоролик ончаш толшо-шамычын кумылыштым чынжымак савыреныт, уло зал кынел шогалын совым кырен. Адакшым сценыш марий рэпер Шып Лий (Денис Шаблий) лектын, да шкетын огыл – изи куштызо Артём Ятманов дене пырля.
Артёмын аваже Екатерина Ятманова – Россий ФСИН-ын 12-шо медсанчастьыштыже врач-психиатр. Тудо теве мом ойла:
– Кунам Денис Шаблий Воронеж олаш каяш да тыгай кӱкшытан мероприятийыште выступатлаш темлен, ончыч ӱшаненат омыл. Но Артёмым ты шонымаш пӱтынек авалтен, садлан конкурсыш каяш келшенна. Тидлан кажне кечын репетицийым эртаренна. Да мый шекланенам: эргымлан шке кундемнан тӱвыражым, калык йӱлам, марий чоным почын пуаш – кугу куан.
Артём эше йочасадыш коштмыж годымак «Национальные костюмы народов Поволжья» конкурсышто участвоватлен. Рвезе аваж дене пырля, Шып Лий рэперын стильжылан эҥертен, кызытсе жаплан келыштарыме марий вургемым ямдыленыт. Конкурсышто выступатлыме видеом соцсетьлаште моткоч шуко еҥ ончен, эсогыл республикысе телевидений денат ончыктеныт. А шке соцкыл лаштыкыштыже Денис Шаблий йочам мокталтен возен.
– Артёмын шинчаштыже тулым ужынам. Тудо мыйын семынак куштен веле огыл, ритмым шижын моштен, чонжым пыштен выступатлен. Премийыш каяш ямдылалтме годым шонымаш шочын: кугу да изи «Шып Лий-влак» иканаште сценыш лектын выступатлат гын, оҥай ыле. Тидын дене ме ончыктенна – марий тӱвыра ила, тудо кушкын толшо тукымлан кусна, – каласкала Денис Шаблий.
Тыге конкурслан номер шочын. Марий Эл нерген палдарыше видеороликым ончыктымеке, сценыш «Эрвел марий» калык ансамбльын артистше-влак выступатленыт. А вара Денис, «Марий Эл – прекрасный край, но самые главные цветы нашей жизни – это дети» манын пелештенат, сценыш Артём лектын. Марий рэп сем почеш брейк-дансым куштен. Зал ылыжын.
Форумын кокымшо кечынже проект-влакым араленыт. Марий Элын командыже мотор номерым ончыктен, тыгодым этнокультурный туризмым вияҥдыме концепций дене палдарен. Форумым 26 апрельыште иктешленыт. Марий Эл «Регион этнокультурного туризма» номинацийыште Гран-Прим налын.
Кумылаҥдыше сеҥымаш
– Сеҥымыланна моткоч куаненна. Кундемна кугужак огыл гынат, калык йӱлам шуктымыжо, мотор пӱртӱсшӧ, талантан еҥже-влак дене чаплана. Вес регионышто шке шочмо мланде дене палдарымаште Артёмынат надырым пыштымыже куандара.
Воронежыште ме марий калык дене палымым ыштенна веле огыл, шкежат моло кундемысе тӱвыра, йӱла нерген шуко пален налынна. Тушко миен толмеке, эргымын кушташ, Марий Эл нерген моло-влакым палдараш кумылжо эшеат чот ылыжын, – манеш Екатерина.
Яра жапыште республикнан делегацийже Воронежын мотор верлажым ончен коштын. Дон эҥер воктене ошкыл эртеныт, Рӱдӧ пазарышкат пурен лектыныт («Российын эн сай пазарже – 2021» конкурсышто сеҥен). И.Н.Крамской лӱмеш художественный тоштер, Благовещенский кафедральный собор поснак шарналт кодыныт.
Йошкар-Олаш толмекыже, Артёмым пӧлек вучен. Марий Элыште туризмым вияҥдыме агентствын директоржо лӱм дене рвезылан таумутым да туристический снаряжений наборым кучыктеныт. Ӱшанена, А.Ятманов шочмо марий калыкшын тӱвыражым, поянлыкшым ончыкыжымат ончыкташ тӱҥалеш. Кӧ пала, ала, илен-толын, сценыш изи Шып Лий огыл, а марий артист лектеш!
Марий Элысе УФСИН-ын пресс-службыжын еҥже Н.Бусыгин.
Пресс-службын пуымо фото-влак.