13 июньышто Санкт-Петербургышто «Пеледыш пайрем» эртаралтын. Пайремым «Ший корно» НКА Марий автономийын председательже Евдокия Соловьева, Ленинград областьысе Келшымаш пӧртын директоржо Владимир Михайленко почыныт. Программе поян лийын.
Концертыште марий композитор И.С.Палантайын произведенийжым «Марий сем» кӱслезе ансамбль йоҥгалтарен. «Югорно» самырык-влакын фольклор ансамбльышт олыкмарий, курыкмарий, эрвел марий-влакын куштымашыштым ончыктеныт.
Ты пайремышке Марий Эл гыч Марий тӱвыра рӱдерын директоржо Наталья Пушкина, «Сото вий» ансамбль гыч Светлана Яндукова ден Эльвира Петрова, кидмастар Евгения Кошкина миен коштыныт. Евгения шке тӱржӧ да ыштыме сӧрастарыш-влакшым ончыктен.
