Пеледыш пайрем лиеш!

"Кугарня" газетын коллективше.

Тений Йошкар-Олаште Пеледыш пайрем 18 июньышто эртаралтеш. Тудо Российысе калык-влакын тӱвыра поянлыкышт идалыклан пӧлеклалтеш. Пеледыш пайремыш Российыште илыше марий-влак погынат, марий тӱвырам ончыктышо ансамбль ден делегаций-влак толыт.

Ончычсо семынак Йошкар-Оласе Рӱдӧ тӱвыра да каныме паркын чыла аланыштыже мероприятий-влак лийыт. Республикысе район-влак «Кудо» конкурсышто таҥасат. Участник-влак посна палаткышкышт шке районысо кочкышым, вургемым, арверым чумырат. Варажым шке мастарлыкыштым да унам вашлийме йӱлам ончыктат. Жюри ончылно выступленийышт 10 минут шуйнышаш.

Уста музыкант-влаклан «Гармоньчо» конкурсым эртарат. Марий патыр-влакым «Черемис модмашке», кирым да пырням нӧлтымашке,  армреслингышке ушнаш ӱжыт. Йоча-шамычым марий калык модыш дене модыктат. Тӱрлӧ мастер-класс лиеш.

Делегаций-влак Агавайрем кумалтышышке, рӱдоласе урем дене ошкыл кайыме колонныш ушнат. Ты пайремыште ялозанлыкыште ойыртемалтше-влакым саламлат.

Кызыт Пеледыш пайремлан ямдылалташ тӱҥалме. А лишыл жапыште Йошкар-Оланам сӧрастарат, тӱрлӧ баннерым вераҥдат.

Эльвира Терентьева.