Паша кече деч вара, кидпашам кучен шинчын, вуйуш кана, адакшым ыштышын лектышыже чоным куандара. Йошкар-Олаште илыше Анфиса Иванован кидше тӱрлӧ сомыллан толеш. Тудо моторын тӱрла, шыште гыч тӱрлӧ оҥай форман сортам, гипс гыч мотор арвер-влакым ямдыла.
Аваж деч тӱрлаш тунемын
Анфиса – Морко район Шлань ял гыч, чон пелашыжым Унчо селаште муын. Ӱдыр аважлан тӱрлӧ сомылым ышташ полшаш изинек йӧратен. Школышто тудо марий йылме уроклан поснак шӱман лийын, садлан школ деч вара МарГУ-ш документшым пуэн, марий йылмым туныктышо специальностьым налын. Студентше годымак Анфиса С.Г.Чавайн лӱмеш Калыкле книгагудыш пашаш толын, кызытат туштак тырша.
– Изиракем годым кочкаш шолташ йӧратенам. Кушкын шуамат, шке ресторанем почам манын шоненам тунам. Школышто тунеммем годымак спице да крючок дене пидынам. Вара марий тӱр тӱняш «шуҥгалтынам». Тӱрлаш авам туныктен, тудо «Акреттӱр» студийыште тӱрлызылан пашам ышта. Мыланем тиде кидпаша тӱҥалтыш гычак куштылгын пуалтын. Ончыч изирак салфетке-влакым тӱрленам, варарак кугурак кидпашалан пижынам. Тӱрлаш чарнен омыл, кумылан-влакым книгагудышто чумырем. Проектем «У старт. 55+» маналтеш, – каласкала А.Иванова.
Ойыртемалтше сортам
Анфисан вес хоббиже уло. Ӱмаште тудо ойыртемалтше форман сорта-влакым ышташ кумылаҥын. Шке кидпашаже-влакым лишыл еҥже-шамычлан пӧлекла, налаш кумылан-влакат лектыт.
Сортам ямдылаш пел кече наре жап кая. Эн ончыч шыштым шулыктарыман, вара келшыше тӱсыш чиялтыман. Тылеч вара шыштым ойырен налме формыш темыман да пел кечылан кылмаш шындыман.
– Икымше сортам ямдылыме годым шукыжым пален омыл: шыштым мыняр градус марте шулыктарыман, сортарӱдӧ могай кӱжгытан лийшаш да молым. Вара интернетыште икмыняр изирак курсым онлайн эртенам. Тушто тиде пашаште сай лектышыш шуаш полшышо шуко ум пален налынам. Сортам сайрак качестван лекташ тӱҥалыныт, – йӧратыме сомылжо нерген ойла А.Иванова.
Эше ик хобби
Анфиса тыгак гипс дене тӱрлӧ мотор арверым ямдыла: ракушкым, сортайолым, кашпом. Кидпашазын ойлымыж почеш, шыште дене таҥастарымаште гипс дене пашам ышташ куштылгырак. Ончыч гипсым вӱд дене варат, ты вартышым келшыше формыш темат да, пеҥгыдеммешкыже, ик сутка шинчыктат. Вара формо гыч луктыт да эше пел сутка кечан верыш кошкаш шындат. Тиде пашаштат сай лектышыш шуаш ӱдырлан жап кӱлын.
Лишыл еҥын полышыжо
– Кеч-могай кидпашам вашкыде, ласкан ыштем, уке гын арвер-влак уда качестван лийыт. Тидын годым тыматле семан мурым чӱктем да сай кумыл дене пашалан пижам. Кумылем уке гын, сомылым омат тӱҥал. Вет кажне арверым ямдылыме годым чоным пыштен тыршыман, тыге веле паша лектышет шкаланет гына огыл, весыланат келша. Йӧратыме сомылым ыштыме годым пелашем полша. Кушто кӱлеш, умылтара, каҥашым пуа. Иктаж-мо ок лек гын, поро мутшо дене кумылем нӧлталеш. А эн тӱҥжӧ –мыйын паша лектышемлан ӱшана, – манеш Анфиса.
Яша шкежат кидпашалан мастар. Тудо пу да регенче дене пашам ышташ йӧрата. Тыге Ивановмыт «Илыш пушеҥге» панном, тыгак сравочлан атым пырля ямдыленыт.
Ивановмыт кидпаша лектышыштым фотош войзат да соцсетьлаш луктыт. Нуным ужын, ятыр еҥ «Мыланемат тыгайым ыштен пуыза» манын йодын возен. Мастар кидан самырык еҥ-влак ончыкыжымат йӧратыме сомылыштым ынешт кудалте, тидын шотышто ятыр оҥай шонымашым илышыш шыҥдарынешт.
А.Иванован альбомжо гыч налме фото-влак.