манеш Морко посёлкышто илыше Татьяна Порфирьева.
Татьяна Васильевна 30 ий наре Морко посёлкысо рÿдö эмлымверыште медсестралан пашам ышта. Яра жапшым сурткöргым сылнештыраш ойыра, пеледыш-влакым ончен кушта
– Паша гыч мöҥгö пöртылам веле, вигак пеледышем-влакым ончаш тÿҥалам. Ончыч – пöртыштö, вара – пакчаште. Тылеч вара веле моло сурт сомылкалан пижам. Мылам пеледыш – илышемын ик ужашыже. Ты пашалан изинекак кумылаҥынам. Ме ешыште шым йоча кушкынна: вич изам, ик акам да мый. Чыланат пеледышым йöратенна. Тиде койыш ачана Василий Александрович деч куснен, очыни. Тудо пеледыш-влакым чот йöратен, – каласкалыш Татьяна Васильевна.
Татьяна Порфирьева 1968 ийыште Морко район Кугу Шоръял ялеш шочын. Нурÿмбал школ деч вара Йошкар-Оласе медучилищыште медсестралан тунем лектын. Пÿрымаш марий ÿдырын корныжым йот л мартеат шуктен. Училище деч вара Моркышто медшÿжарлан пашам ыштымыж годым тудым направлений почеш Германийыш фельдшерлан пашам ышташ колтеныт улмаш. Кум ий наре тушто пашам ыштымеке, Татьяна Васильевна шочмо кундемышкыжак пöртылын. Тудо кажне кечыжым еҥ-влакын тазалыкыштым аралыме пашалан пöлекла.
Пелашыж дене кок икшывым ончен куштеныт. Йоча-влак йол ÿмбак шогалыныт, вес кундемлаште илат. А ÿдырамаш шке поро кумылжым пеледышыже-влаклан пöлекла.
– Пеледыш-влак чоным куандарат, эмлан, кумылым нöлтат. Но тыгодымак нуно изи йоча гай улыт, коклан нечкышланат. Нуным эре эскерыман, жапыштыже вÿдым шавыман. Кызыт вет могай гына чер уке, тыгак тля, тÿрлö шукш-копшаҥге-шамыч саскам локтылын кертыт. «Эм»-влакым кевытыште наледем. Тыгак кушкыл таза лийже да моторын пеледше манын, ÿяҥдышым пуыман.
Татьяна Васильевна пеледыш нöшмым але росотам тÿҥ шотышто шке ямдылкала. Тыгак палыме еҥ-влак деч тÿрлö у сортым налеш. Кызыт ÿдырамашын пачерыштыже 20 тÿрлö пеледыш кушкеш. Тÿҥ шотышто – орхидей, герань, фиалке-влак. А пакчаште могай гына саска уке! Чылаже тыште 80 наре кушкыл уло. Тылеч посна озавате пакчасаскам, емыжым ончен кушта. Кызыт Порфирьевмыт пеледыш дене волгалтше мланде кумдыкышто пöртым чоҥат. А сылне пеледыш-влак ты пашаште шке озаштлан вий-куатым, ÿнарым ешарат. Тек пÿртÿсын мотор «игыже-влак» ончыкыжымат илышыште вашлиялтше нелылыкым сеҥаш полшат, чоным эмлат.
Озавате деч ой-каҥаш
Ломыжым, нужым да моло шудым кугу печкеш оптыман да шукташ шындыман. Ик корка шушо вартышым лейкыш ешарыман да пеледышыш шавыман.
