Шуко шочшан ешлан мый эреак порын кӧранем. Тиде – кугу пиал! Морко посёлкышто Эльвира ден Мирослав Михайловмыт куд шочшыштым чинче падыраш семын йӧратат. Тыгеже шым икшыве лийын, но кугуракше, Вероника, 10 ияшыж годым Морко посёлкысо ерыш пурен каен колен. Кызыт пеледыш гай вич ӱдыр да кампетке гай ик эрге ача-аван чоныштым куандарат.
«Пелашемлан самодеятельный композитор Вячеслав Осиповын «Вероника» мурыжо келшен, эре тиде мурым мура ыле. Садлан кугурак ӱдырланна Вероника лӱмым пуэнна. Вара Елена, Мария, тудо мемнан Маша огыл, а Мария, Наталия, Олеся, Максим да Анастасия шочыныт. Кугурак икшывына-влак пашам ыштат, тунемыт, а пеленна кок изирак шочшына улыт. Йошкар-Олаште азам ыштымем годым доктор «Вич ӱдырым ыштетат, вара эргылан толат» манын. Максим визымше классыште, а Настя 4-ше классыште тунемыт. Ик йочамат нечкын ончен огынал, изинек пашалан тунем кушкыныт, икте-весылан вашла полшат. Ик ӱдырем «Авай, эше азам ончымына шуэш, кунам йочам ыштет?» йодеш. Ме пелашем дене, Юмылан тауштен, нине шочшына-влакым йол ӱмбак шогалташ, чын корныш лукташ тыршен илена», – ойла Эльвира Владимировна.
Тудо Морко школышто кандаш классым тунемын пытарыме деч вара Йошкар-Оласе кооперативный техникумыш повар-кондитерлан тунемаш пурен. Йошкар дипломым налше ӱдырын умбакыже технолог лиймыже шуын, садлан Кострома олашке технологический техникумыш тунемаш пурен. Нуръял рвезе Мирославлан марлан лекмыжлан кӧра заочно тунемаш куснен, сессийыш Моско ола гоч кудалыштмыжым кызытат порын шарналта.
Мирослав Михайлов шым йочан ешыште кушкын. Тудын аваже – поэт Аркадий Букетовын шочмо шӱжарже. Ты еш пашаче, тыгак шке велне палыме. «Нуръялыште кок ий илымеке, Моркышко куснышна, ачамын-авамын ош тӱня дене чеверласымекышт, сурт яра ынже шинче манын, тушко посна лекна. Вольыкым ашненна, оралтым тӧрлышна, вара весым чоҥаш тӱҥалынна. Ынде йочана-влак кушкын шуыныт, пырля погынена, тидыже мыланна кугу пайрем да куан», – ойла Эльвира Михайлова.
Кугу ешлан кочкаш ятыр шолтыман: шым литран кастрюльыш шӱрым, пареҥгым, пучымышым… «Шуко шолтен тунемынам да кызытат тидыже кодын, кугурак йочана-влак ӧрдыжтӧ илат, «Эх, кызыт пеленем лийыт гын, шер теммеш кочкыт ыле» манам. Еш дене кок гана теҥыз воктене каненна, изиракышт годым нигушко торашке лекме огыл, эре паша шуко лийын. Ынде канаш жапым ойыраш тыршена», – манеш Эльвира Владимировна.
Шыргыжалын мутланымыж дене тудо кумылым савыра. Кызыт Э.Михайлова пӧръеҥ вургемым ужалыме Морко посёлкысо ик кевытыште тырша. «Йочам годым врач лияш шоненам ыле, Йошкар-Оласе медучилищыш тунемаш пурышым, но илаш вер укелан кӧра (училищын шке тӱшкагудыжо лийын огыл), садлан кооперативный техникумыш кайышым. Кызыт шочшына-влак кушко тунемаш кайынешт, могай пашам чон йодмо почеш ойырен налнешт, шонымыштым шуктышт, нимыняр тореш омыл», – умбакыже ойла шуко шочшан ава.
А йоча-влак ача-аваштым моткоч йӧратат. Нуно тораште улыт гынат, пайремлан курьер дене пӧлекым, пеледышым колтат. Кок ий ончыч Михайловмытлан «За любовь и верность» медальым да «Ромашка» значокым кучыктеныт. Тыгай наградым Российысе эн сай, ятыр ий пырля илыше да шуко шочшан ешлан пуат. Икымше гана тыгай награде наборым 2008 ийыште ыштеныт да тудым социально-культурный фондын инициативыж почеш илышыш пуртеныт.
Суртоза Мирослав Евгеньевич Моркышто холодильникым, тӱрлӧ техникым ачалымыж дене палыме. Самырыкше годым Афганистаныште служитлен. Салтак йолташыже-влак дене тачат кылым йомдарен огыл. Кодшо кеҥежым Пошкырт кундем гыч Ольга ден Ульян Миннингалинмыт Моркышко толын каеныт ыле, ынде нуно Михайловмытым шкешт деке Илиш районысо Марино ялышкышт вучат.
Теве тыге ила шуко шочшан Михайловмыт еш Морко кундемыште. Чон поянлыкыштым нуно шкешт гаяк поро шочшыштлан пӧлеклат да кажне кечыштлан йывыртен моштат.