Таче шуко ӱдырамашын пелашыже, аван эргыже Украиныште СВО-што элна верч лӱддымын кредалеш, тыныслык верч пеҥгыдын шога. Шукын лишыл еҥыштым сӧй пасуш ужатеныт, кажне кечын пӧртылмыштым вучен илат. Илышын тура савыртышыже шкем пеҥгыдын кучаш, ончыко ӱшан дене ошкылаш туныкта.
Тачысе лаштыкнан унаже – Курыкмарий район Сарапай ялеш шочын-кушшо, Козьмодемьянск олаште илыше Анастасия Таюкова. Тудын Эдуард пелашыже Украиныште спецоперацийыште элнам ынде кокымшо ий арала.
Декабрь мучаште Курчак театрыште эртаралтше Марий Элым Вуйлатышын ёлкыштыжо Анастасия дене чакрак палыме лийым. Тушко тудо 2-шо классыште тунемше Виктория ӱдыржым конден ыле. У ий пайрем озаланен гынат, нунын чоныштышт тургыжланымаш садак лийын. Теве чыла пыта, ачашт пӧртылеш, уэш пырля лиеш. Тыгай шонымаш эре ушыштышт пӧрдеш, ласкан шӱлалташ эрыкым огеш пу.
Таюковмытын суртышкышт мобилизаций нерген увер кӱдырчӧ рашкалтыме семын пурен, чон ласкалыкым «шолыштын». Суртоза Эдуард тушко каяш, элым аралаш ямде лийын. Шуко шонкалыде, корнышко тарванен. Пелашыж нерген каласкалымыж годым Анастасиян шинча йырже вӱд нале, йӱкшат чытырналт лекте.
– Мутат уке, неле. Но мый шкем кучаш тыршем, вет кум йочам ончен куштыман. Кандаш ияш Виктория школыш коштеш. Сӱретлаш кумылан, художественный школышто тунемеш. Вич ияш йыгыр эрге-влак Даниил ден Иван йочасадыш коштыт. Мобилизаций Викториялан кугу стрессым ыштыш. Ачаж верч тургыжланен. Тидым школышто туныктышо-влакат шекланен шуктеныт. Кызыт изиш лыпланен.
Пелашем отпускыш кок гана толын каен. Йӧн лиймеке, телефон дене мутланена. Таза пӧртылжӧ манын, тудын верч Юмылан кумалына.
А тыгай ёлко пайремыш икымше гана толынна. Мыланем, Викториялан тудо чот келшен. Поснак «Снежная королева» спектакльым ӱдырем йӧратен ончен. Пӧлекат куандарен, – каласыш А.Таюкова.
Самырык ӱдырамашлан кум шочшо вуйым сакен шинчаш огеш пу, кушеч-гынат вийым налаш, йол ӱмбалне пеҥгыдын шогаш полша. Вет ава кызыт ачамат алмашта, нунылан кок пачаш чон шокшым, йӧратымашым пӧлеклыман.
Анастасия профессийже дене – филолог. Но кызыт мӧҥгыштӧ пашам ышта. Эдуард пелашыже – Курыкмарий район Когосола села гыч. Анастасиян мутшо почеш, икте-весым дискотекыште вашлийыныт, варажым келшаш тӱҥалыныт. Тыге Таюковмыт еш шочын. Суртоза – кидлан мастар еҥ. Мобилизаций деч ончыч Эдуард еҥ-влакын машинаштым ачален. Таюковмытын шке автосервисышт лийын, но кызыт тудым петырыме.
Анастасия Эдуард пелашыж дене кугешна. Тудо элна ончылно шке порысшым шукта, тыгодым подвигымат ыштен шуктен. Неле-йӧсым сеҥаш, тушманым чактараш ешыже тудлан куатым пуа, ӱшан дене ончыко каяш полша.