Медведево район Руэм посёлкысо ипподромышто эртаралтше регион-влак кокласе «Йошка Еш» гастрономический фестиваль годым туризмым вияҥдыме, круизный программым ямдылыме, инфраструктурым саемдыме йодышлам каҥашеныт.
Тыгодым кодшо ийын республикыштына 1 миллион 200 тӱжем турист лийме нерген ушештареныт. Тенийысе идалык тӱҥалтыш гыч кундемна дене 600 тӱжем еҥ палыме лийын. Нуно утларакшым Йошкар-Олам, Юрино посёлкым да Кокшайск селам ойыреныт. Садлан кундемыштына круизный туризмым вияҥдыме нерген ойленыт. Тидланже судно-влаклан чарнен шогалашышт йӧным ыштыман. 2026-2028 ийлаште Кокшайск селаште пассажир-влаклан причалым чоҥаш палемдыме. Тидлан 640 миллион теҥгем ойырат. Тыгак Юрино посёлкышто тыгаяк причалым 2027 ий мучаш марте чоҥышаш улыт.