20 октябрьыште Морко район Кокласола лицейыште «Учитель! Перед именем твоим!» конференций лийын.
Тудым лицейын самырык педагогшо А.В.Михайлован Марий Эл Республикым Вуйлатышын добровольчестве областьыште налме грантше кӱшеш эртарыме.
Тушто йоча-шамыч туныктышо да тудын профессионал да моло койышыжо, еш династий-влак нерген шымлымаш-влакым каласкаленыт. Гран-прим Кокласола лицейыште 10 «А» классыште тунемше-влак налыныт. Нуно Российын сулло, Марий Элын калык туныктышыжо, РФ-ште кум гана эн сай туныктышылан шотлымо В.М.Васильеван педагог мастарлыкшым сайын почын пуэныт.
«Тукымвож», «Поян историян материал», «Марла ямдылыме эн сай паша» номинацийлаште Кокласола лицейын, Унчо, Зеленогорск, Волаксола да Моркысо 2-шо №-ан школла гыч самырык шымлызе-влак призовой верлашке лектыныт. Зеленогорскысо школышто 1-ше классыште тунемше С.Игнатьева туныктышо еш династий нерген оҥайын каласкален.