Кодшо кечылаште Марий Эл Республикыш Китайысе Ляонин провинцийын Ужалыме департаментше гыч делегаций толын.
Вашлиймашым Марий Эл Республикысе промышленность, экономический вияҥмаш да торговльо министр С.Крылов эртарен.
Тений индеш тылзыште Китай ден Марий Эл коклаште внешнеторговый оборот 29,2 процентыш шуын. Ӱмашсе дене таҥастарымаште тудо 28,4 процентлан кушкын.
Индеш тылзыште Китай гыч сатум 36,5 процентлан шукырак налме. Тиде оборудований ден механический устройство (46,6 процент), пластмассе да тудын гыч ыштыме арвер-влак (12,9 процент), электрический машина ден оборудований (10,3 процент).
С.Крыловын палемдымыж почеш, Китай ден Марий Эл икмыняр направлений дене пашам ышташ тӱҥалыт:
- Марий Эл Китайыш кылмыктыше оборудованийым колташ тӱҥалеш. Тидын шотышто кундемна Российыште ончылно кая.
- Марий Эл китай партнёр-влак дене пырля холодильниклан кӱлеш арверым ямдылаш палемда: вӱргене пучым, холодильник-влаклан компрессор-шамычым, вентиляторым да молымат.
- Кумшо: радиоэлектронный промышленность аланыште коопераций кылым вияҥдат.
- Тыгак Марий Эл китай партнёр-влак дене пырля автомашиналан арвер-влакым ямдылаш шона.
Вашлиймаште тыгак агропромышленный комплекс, образований да туризм шотышто икте-весе дене пашам ышташ кутырымо.