Еш шочыктымо деч ончыч икте-весылан вашла полшаш ямде улмым, аралтышым, эҥертышым, пагалымашым шижман. Тыгак нелылыкым да куаным пырля пайлен, сай ончыкылык верч тыршыман. Ты шижмашым кок еҥ ончыко моштен вӱда гын, еш йолӱмбалне пеҥгыдын шогаш тӱҥалеш. Тыге ойлат Медведево посёлкышто илыше шуко шочшан ача-ава Абросимовмыт.
Йошкар-Олаште шочын-кушшо ӱдыр ден Морко район Шеҥше селасе каче 2010 ийыште ешым чумыреныт. Тылеч ончыч нуно кум ий чоло келшеныт. Кызыт Диана ден Валерий кум икшывым ончен куштат.
Диана Марий кугыжаныш университетыште биолог профессийым налын. Йошкар-Оласе биолого-клинический шымлыме лабораторийыште пашам ышта. Тысе специалист-шамыч вӱрым тергат. Валерий Йошкар-Оласе аграрный колледжым тунем лектын, водительлан тырша. Кундемна мучко кевытлашке сатум шупшыкта.
Кажне йоча – ойыртемалтше
2012 ийыште ешыште икымше ӱдыр, Аня, шочын. Аважын ойлымыж почеш, тудо моткоч ныжыл кумылан, чылажымат шӱм-чон вошт колта. Кызыт ӱдыр 7-ше классыште тунемеш. Шкенжым тӱрлӧ вере шуарен: музыкальный школышто, куштымаш кружокышто, спортышто. Шукерте огыл волейбол секцийыш ушнен, тудлан тушто моткоч келша, манеш ава. Аня тренировкыш кумылын коштеш.
2017 ийыште Света ош тӱням ужын. Ӱдыр чолга да чулым кушкеш. Чыла вере шуаш тырша. Койышыштыжо пеҥгыдылык, шонымашке шуаш лидер лияш тыршымаш шижалтыт, палдара Диана. Света кокымшо классыште шинчымашым пога. Тыгак вокал, рисований, бисероплетений дене заниматла да англичан йылмым тунемеш. Тӱрлӧ конкурсышто шкенжым терга.
2022 ийыште Богдан шочмыж дене ешым куандарен. Тудо йочасадыште шуаралтеш. Тений гыч футбол секцийыш кошташ тӱҥалын.
Кугу еш – кугу ответственность
– Кум йочан ава лиям манын, ик ганат шонен омыл. Мый ешыште ик ӱдыр улам, пелашемын ешыштыже кок йоча кушкыныт. Но авам эреак ойлен: ӱшанле, сай пелашым вашлият гын, йочам ышташ ит лӱд, сай айдеме деч ош тӱняшке икшыве-влакым шочыктыман. Тидым мый ӱмырешлан шарнен кодынам. Пелашем тыматле, ӱшанле, кеч-кунамат полшаш ямде. Садлан икшыве-влакым воспитатлымаште уто нелылыкым ом шиж. Ме чылажымат пырля ыштена, – каласкала Диана.
Еш – тиде ответственность, а кугу ешыште тудо эшеат шукырак. Но пелен сай еҥ уло гын, куштылгырак. Аван ойлымыж почеш, икшыве-влак коклаште тӱрлыжат лиеда: ӱчашымаш, сырымаш, тавалымаш. Но ака-шӱжар-шольо икте-весым йӧратат, чаманат, перегат, ваш-ваш эн лишыл еҥ улмыштым палат.
– Шукыж годым кугурак-шамычше изиракшым сыратылыт. Йоча вет улыт, садлан шып шинчышаш огытыл, – манеш ава.
Воспитанийлан – тӱткыш
Абросимовмытым тыге воспитатленыт – кугурак-шамычлан полшыман. Садлан нуно кок могырымат ача-аваштлан тӱрлӧ семын полшаш тыршат. Кеҥежым Шеҥше селаште утларак жапым эртарат. Вет ты тургымышто мланде пашам шуктыман, телылан шудым ямдылыман да молымат тӧрлыман. Тыгак Дианан ача-аважын ола воктенысе дачыштышт тӱрлӧ сомылым вораҥдараш полшат. Тудо олаште шочын-кушкын гынат, ушкалымат лӱштен мошта, шудымат удыра, киярымат шинчалта, когыльымат кӱэштеш. Тидлан ӱдыржӧ-влакымат туныкта.
Паша – паша дене, но еш дене пырля каныш кечым эртарымылан нимо огеш шу. Тыгайже годым Абросимовмыт пӱртӱсыштӧ лияш йӧратат. А ялыште тидлан утларак йӧн уло, ойла шуко шочшан ава. Тыгак ешыште кажнын шочмо кечыжым пайремлымылан, Рошто ден Кугечылан тӱткышым ойырат. Рошто пайремлан, мутлан, ӱдыр-шамыч дене руаш гыч пӱкшым кӱэштыт.
– Ешыште кеч-могай йодышым вате-марий пырля решатлышаш улыт. Тидыже йоча-шамычын ешын поянлыкше нерген шонымашыштым пеҥгыдемдаш полша. Ача-аван еш верч пырля тыршымыштым ужын, ончыкыжым нунат тыгак ышташ тӱҥалыт, – палемда Диана Абросимова.
Кызыт кугыжаныш могырым шуко шочшан еш-влаклан тӱрлӧ семын полшат. Еш бюджетым пойдаыме шотышто программе-влак илышыш шыҥдаралтыт, льгото да услуго-влак улыт. Абросимовмытат икмыняр тыгай льгото дене пайдаланат: икшыве-влак школышто оксам тӱлыде кочкыт, кажныштлан единый пособийым пуат, ЖКХ да корно роскотын икмыняр ужашыжым пӧртылтат.
Конешне, тыгай полыш уло гын, тиде моткоч сай. Но сай икшыве-влакым воспитатлымаште тӱҥ рольым ача-ава налыт. Садлан шуко шочшан ача-аван еш нерген шонкалымашышт дене мыят тӱрыснек келшем.
Еш альбом гыч налме фото.