19 майыште 12 шагатлан Йошкар-Оласе рӱдӧ каныме паркыште (тулото аланыште) «Патыр-влакын модышышт» («Богатырские забавы») лӱман мероприятийым Марий Эл Республикын молодёжный политике, спорт да туризм шотышто министерствыже да марий епархий эртарат.
Тиде мероприятий «Кугезе-влакым шарнен да нунылан ӱшаным сулышо лийына!» проектлан эҥерта, да Александр Невскийлан 800 ий темме кечылан пӧлеклалтеш. Тидыже самырык-влакын яра жапыштым пайдалын эртараш да таза илыш-йӱла кучен илаш ӱжеш.
Программыште: мероприятийым почмаш, исторический реконструкций клубын выступленийже, тыгак кандаш площадкыште калык модыш-влакым эртарымаш да наградым кучыктымаш.
Ты годымак соцкылыште #АлександрНевский12, #БогатырскиеЗабавы2021, #Молодежь12 решотка дене вераҥдыме фотографий конкурсым иктешлат.
Мероприятийышке Марий Элын профессионал шинчымаш организацийын командыже-влак толыт. Организатор-влак 150 учстникым вучат.
Валентина Семёнова.