Руслан Семёноват ты ялын шочшыжо да спецоперацийын участникше. 1995 ий 17 августышто Алевтина Витальевна ден Владимир Геннадьевич Семёновмытын ешыштышт йыгыр йоча (ӱдыр ден эрге) шочын. Ача-ава икшывыштлан йомакысе герой-шамычын лӱмыштым – Руслан ден Людмила – пуат. Руслан чылт йомакысе патыр гаяк лӱддымӧ, виян эрге кушкын. Спортлан шӱман лийын, тӱрлӧ таҥасымаште школын чапшым арален. Школым тунем пытарымеке, армийыш каен. Рвезе улыжат 27 ийым илен, тушечын индешыжым армийлан пӧлеклен. Службым Тольятти оласе 3-шо специальный гвардийын бригадыштыже тӱҥалын, туштак контракт почеш служитлаш кодын. 2016-2019 ийлаште Сирийысе конфликтыште младший сержант снайпер лийын. Армий деч вара частный военный компанийыште инструктор пашам шуктен. Тудо IV степенян «Георгиевский Крест» да Патырлык орден-влак (колымекыже), II степенян «За воинскую доблесть», «За службу в спецназе», «Участник военной операции в Сирии» медаль-влак дене палемдалтын. Тӱрлӧ спорт таҥасымаште сай результатым ончыктымыжлан ятыр диплом да грамот дене суапландаралтын.
2021 ийыште Руслан ешаҥын, а 2022 ийыште Украиныште спецопераций тӱҥалын. Ятыр ий армийыште служитлыше рвезылан тидым ӧрдыж гыч эскераш йӧндымӧ лийын, чон элым аралаш, шке калык верч шогаш ӱжын. Тыге тудо службым эртыме верыштыжак уэш контрактым пеҥгыдемда да СВО-ш кая.
СВО-што Руслан нелын сусырга, ик жап госпитальыште эмлалтеш, шочмо ялыштыже лишыл еҥже-влак денат жапым эртараш йӧн лектеш. Тидыже рвезылан шкешотан вий-куатым ешарен. Тудо лӱйкалымаш кайыме верышке уэш каен. Тудын тыгай ошкылжо нерген аваже веле пален огыл. Пытартыш корныш ужатыме годымат тудо эмлымверыште лийын, тидланже Алевтина Витальевна тачат чот ойгыра. Русланын колымыж деч вара тудын эргыже шочын. Ача ден эргылан ты тӱняште вашлияш пӱралтын огыл. Изи Егорын ачаже мемнан тыныслыкна верч шке илышыжым пуэн.
2022 ий 13 ноябрь Русланын пытартыш илыме кечыже лийын. Марий салтакын ӱмыржӧ Луганск областьысе Макеевка села воктене кӱрылтын. Тудо мемнан шӱмыштына тыгаяк поро кумылан, илышлан куаныше, эреак шыргыжше кодеш.
2023 ий 13 июньышто Морко районысо Шордӱр школ пырдыжыште Руслан Семёнов лӱмешат Чап оҥам пижыктыме да аважлан геройын Патырлык орденжым кучыктымо.
КУШНА ЭРИК.
Р.Семёновын альбомжо гыч налме фото.