26 январьыште республикысе тунемме верлаште да Самырык-влаклан полатыште Шочмо элым аралыше-влакын кечышт вашеш оборонно-массовый да военно-патриотический паша месячникым почмо.
Месячник икмыняр датылан пӧлеклалтын. Тений Российысе флагым пеҥгыдемдымылан 30 ий темеш, тӱняште космонавт Ю.А.Гагаринын космосыш икымше гана чоҥештымыжлан – 60 ий, Кугу Отечественный сар тӱҥалмылан – 80 ий, Маршал Г.К.Жуковын шочмыжлан – 125 ий, Иван Грозный годым икымше воинский уставым ыштымылан – 450 ий, кумдан палыме князь да полковедец А.Я.Невскийын шочмыжлан – 800 ий.
Самырык-влакын полатыштышт месячникым почмо годым Сеҥымашлан 75 ий темме идалыкым Марий Эл Правительстве вуйлатышын икымше алмаштышыже М.З.Васютин иктешлен ойлен. Тудо 2020 ийысе ик эн кугу событийлан Медведево район Сурок посёлкышто сусырген да черланен колышо 555 салтаклан мемориал комплексым почмым шотлыман манын. Кокымшо – Ленинград кундемысе Пискарево шӱгарлаште Шарнымаш аллейыште мемориал оҥам вераҥдымаш. Тыгак Российысе студенческий кычалше отряд-влакын V слётыштым Марий Элыште эртарыме.
Республикна кодшо ийын Российысе 43 акцийыш ушнен, Сеҥымашлан пӧлеклалтше 200 утла мероприятийыште участвоватлен. Месячникым почмо годым кодшо ийын эртаралтше тӱрлӧ конкурсышто сеҥыше-влакым саламленыт.
Нунын кокла гыч иктыже – военно-патриотический клубым (ушемым) вуйлатыше ден тусо воспитанник-влакын профессионал мастарлыкыштым тергыше «Делай как я» Российысе конкурс. Тушто 29 еҥ таҥасен.
«Военно-патриотический клубын (ушемын), патриот воспитаний рӱдерын але юнармейский отрядын эн сай вуйлатышыже» лӱм дене Козьмодемьянск олаште ешартыш образованийым пуышо «Станция юных техников» организацийым вуйлатыше Алексей Кузнецовым суапландареныт. «Военно-патриотический клубын эн сай воспитанникше» номинацийыште Йошкар-Оласе 9-ше №-ан школысо юнармеец-влакын «Орлята» отрядшын еҥже Елисей Вохминцев сеҥен.
Вес конкурс – «Я расскажу вам о Победе». Тыгодым участник-влак Сеҥымашлан 75 ий темме лӱмеш видеороликым ямдыленыт. Чылаже конкурсыш 79 паша темлалтын. 7-13 ияш-влак коклаште икымше верыш Йошкар-Оласе 6-шо №-ан школышто тунемше Евгений Ноженко лектын, кокымшыш – Килемар районысо Вӹзӹмйӓр школ гыч Егор Самаров ден Медведевысе 2-шо №-ан школ гыч Игорь Афанасьев, кумшыш – Козьмодемьянскысе усталык пӧртын тунемшыже Марина Немихина. 14-17 ияш-влак коклаште ойыртемалтыныт: Козьмодемьянскысе 3-шо №-ан школ гыч Екатерина Январцева ден Анастасия Астафьева (1 вер), Марий Турек школ гыч Татьяна Холкина, Волжск оласе лицей гыч Екатерина Федотова (2 вер), Семёновкысо школ гыч Константин Шевелёв (3 вер). «ЗУМ» йоча киностудийлан спецпризым кучыктымо. Саламлена!
Евгений Ноженко:
– Ме шкенан 4 «а» класс дене Кугу Отечественный сарыште З.Ф.Прохоровын подвигше нерген видеороликым ямдыленна. Совет Ушем Герой шке капше дене пулемётым петырен. Тудын поступкыжо пырля служитлыше-влакым утыр талын кредалмашке каяш таратен – тыге тушман деч Ходош селам утарен кертынна. Мый ты видеороликыште тӱҥ геройын – Зинон Прохорович Прохоровын – рольжым модынам, а пырля тунемше-влак – пелашемым, йолташем-влакым. А съёмкым Йошкар-Ола деч тораште огыл, кӱртньыгорно станций воктене, ыштыме.