12 июньышто Йошкар-Олаште В.И.Ленин лӱмеш площадьыште Российын кечыжлан пӧлеклалтше торжественный мероприятий эртаралтын. Тушто Марий Элым Вуйлатыше Ю.Зайцев лийын, еҥ-влакым пайрем дене саламлен.
Тудо палемден: элнан тӱзланымашкыже Марий Эл кугу надырым ышта. Специальный военный операцийыште боец-влак патырлыкым ончыктат. Республик экономикыште, социальный аланыштат сеҥымашыш шуэш. Тидыже Российым вияҥдаш, тудын суверенитетшым пеҥгыдемдаш полша.
Марий Элым Вуйлатыше Йошкар-Оласе 14 ийым темыше ӱдыр-рвезе-влаклан паспортым кучыктен. Тиде – Денис Артюшкин, Анастасия Жирова, Дарья Казанцева, Владимир Маслов, Марк Митюшин, Полина Никифорова, Лев Сергеев да Александр Цепелев.
Тыгак Ю.Зайцев Республикыште илыше еҥ-влаклан наградым пуэн. Россий Президентын таумутшо дене Марий Эл Республикысе айдемын праваж шотышто Уполномоченный Ф.Мумаметгалиевым палемдыме.
«За заслуги перед Марий Эл» I степенян орденым В.М.Васильев лӱмеш МарНИИЯЛИ-н «Археологий» направлений дене пашам ыштыше тӱҥ шанче пашаеҥ Т.Никитиналан кучыктымо, «За заслуги перед Марий Эл» II степенян орденым – Йошкар-Оласе шыл комбинатын слесарьже Д.Шипуновлан.
«За заслуги перед Марий Эл» орденын медальжым пуымо: «Гранит» частный охранный предприятийын, тыгак «За Марий Эл» поро кумылым ончыктышо фондын директоржо Р.Золотухинлан, сар, паша, Вооружённый Вий, правоохранительный орган дене кылдалтше ветеран (пенсионер-влакын) российысе мер организацийыштын Шернур районысо организацийжын председательже З.Зориналан, «Объединение организаций профсоюзов Республики Марий Эл» ушемын председательже А.Майоровлан.
Марий Элым Вуйлатышын «Участнику специальной военной операции на Украине» медальжым А.Протасевичлан, Ю.Петринлан, А.Ситниковлан кучыктен.