Параньга посёлкышто шочын-кушшо Олег Лаврентьевич Анисимов корным ыштыме пашам 20 ий наре шукта. Тудо «Марий Эл Дорстрой» АО-н Марий Турекысе филиалыштыже (Параньга участкыштыже) тырша.
Трактористлан тунемын
Корно пашаште тынар ий тыршымеке, Олег Лаврентьевич опытым поген шуктен. Коллективыште тудо пагалыме еҥ, кеч-кӧлан полыш кидым шуяш ямде.
Школышто тунеммыж годым тыгай профессий нерген тудо ик ганат шоналтен огыл. Школ деч вара Параньга СПТУ-шко тракторист-машинистлан тунемаш пурен.
«Шке профессий дене пашам ыштен омыл. Параньга посёлкышко кугыжаныш корно отделышке (доротдел) пашам ышташ пуренам. Варажым тудо «Марий Эл Дорстрой» кугыжаныш учрежденийын Параньгасе филиалже маналтын. Тачысе кече марте тыште тыршем», – мане О.Анисимов.
Коллектив рвезым пеш порын вашлийын. Кугурак опытан-влак мом да кузе ыштышашым шот дене умылтареныт. Чылажат у, палыдыме лийын гынат, тыште тудлан моткоч келшен. Варажым Олег Лаврентьевич тидын шотышто шинчымашымат нӧлтен толын.
Тӱрлӧ ялыште корным тӧрла
2010 ийыште «Марий Эл Дорстройын» Параньга районысо филиалже Марий Турек район дене иктеш ушналтын. Тыге Параньга район тудын участкыжлан шотлалташ тӱҥалын. Ты организацийын бригадыже кок пошкудо районын тӱрлӧ верыштыже шуко корным тӧрлен, ыштен. Тыгак Олег Лаврентьевич изи яллашке корным шараш коштын.
«Пашам тӱҥалме годым корнылаште шошо вӱд кайыме деч бетон трубам пыштенна, ачаленна. Тыгай пашам вич ий шуктенам. А 2012 ий гыч геодезистын полышкалышыже лийынам. Рейкым кучен, тоям шогалтен каенна. Корнын могай лийшашыжым план почеш негызленна. Лопкытшым, кужытшым палемденна, корнын тайнымыжым тергенна. Тиддеч посна мастерлан полышкаленам. Мо гынат паша шуко. Кольмо денат ышташ логалын.
Ме шаргӱ шартышан, тыгак асфальт корным ыштенна. Мутлан, 2017 ийыште Параньга район Олор ден Сидор почиҥга ялла коклаште, 2018 ийыште Марий Турек район Арбор кундемыште, 2019 ийыште Марий Пыламарий селаште, кодшо ийын Дружино ден Исмаил яллаште корнылам ыштенна.
Южгунам командировко дене вес районлашкат лектын коштына.
Тений гыч мый асфальтоукладчик дене ыштыше оператор улам. Асфальтым шараш тӱҥалынам. Ты технике дене Советский районысо Кодам могырыш корным ыштымашке коштынам», – ойла самырык пӧръеҥ.
Икоян коллектив
Корно пашаеҥ шке сомылжо нерген шуко каласкалыш. Тудын ыштыме бригадыште кызыт 15 наре еҥ уло. Шофёр, механизатор, тыглай пашаеҥ-влак чыланат икте-весылан ваш эҥертен тыршат. Паша тыште «шолеш», манаш лиеш. Кугу машина-влак лым лийде кудалыштыт, ошмам, шаргӱм шупшыктат.
«Ме, лум шулен пытымеке, апрель мучаш але май тӱҥалтыште, пашашке лектына да ноябрь марте ыштен кертына. Паша неле, чытышым йодшо. Шокшо кече годым поснак йӧсӧ. Туге гынат тыршена», – каласкала О.Анисимов.
Телым Олег Лаврентьевич «Марий Эл Доростройын» Марий Турек филиалышке пурышо (Параньга участкыштыже) котельныйыште операторлан ышта. Конторышко, гаражышке шокшым пуа.
Кум шочшан ача
Олег Лаврентьевич пашаште кӱлешан специалист гын, мӧҥгыштӧ – йӧратыме ача, ӱшанле пелаш. Ешге Параньга посёлкышто илат. Марина пелашыже Советский район Кугу Кодам ял гыч. Тудо Параньга посёлкысо ик предприятийыште ургызылан тырша. Вате-марийын чон поянлыкышт, кугу ӱшанышт – Женя, Артём, Кирилл эргышт-влак. Женя Параньга посёлкысо школышто 7-ше классыште тунемеш, вич ияш Артём ден кум ияш Кирилл йочасадышке коштыт.
Кочкаш шолта, колым куча
О.Анисимовын кидше чылалан мастар. Мом ышта – чыла шотлан толеш. Чоҥымо, тӱрлӧ отделке пашам ышташыже шагал огыл логалын. Йолташыже, родо-тукымжо-влаклан оралтым чоҥаш але иктаж-мом ачалаш полшаш коштын. Пӧртысӧ пачержым тӱслен ончен лекмеке, тудым мастар улмыжым вигак умылаш лиеш.
Олег Лаврентьевич тамлын кочкаш шолтен моштымыж дене ойыртемалтеш.
Вес йӧратыме сомылжо – колым кучымаш. Пӱртӱс лоҥгаште, эҥер воктене колым кучен шинчен, тудо неле паша, уто шонымаш деч шкенжым кандара, тыгодым чон ласкалым налеш.
Илышыште пӧръеҥ чыла ыштен моштышаш, пӱрымаш корнышто пеҥгыдын шогышаш да ешым аралышаш. Олег Лаврентьевич – тидын шотышто тале пӧръеҥ, пеҥгыде суртоза. Тудын дене мутланен, кӧргӧ чон поянлыкшым да чыла могырымат мастар улмыжым умыленам. А мыскара йӧре шыргыж воштылмыжо шӱлыкым покта, кумылым нӧлта.