12 июньышто Йошкар-Оласе «Дружба» стадионын теннисный кортыштыжо пашазе-влаклан Российысе VII спартакиадын регионысо йыжыҥже лийын.
Тений тудо Российысе спортын да физкультурын кугыжаныш органын управленийжым ыштымылан 100 ий теммылан келыштаралтын. Пашазе коллектив-влак баскетбол, волейбол, ӱстембал теннис да шахмат дене модмаште, кирым нӧлтымаште таҥасеныт. Тыгак спортивный еш-влак ӱчашеныт. Спартакиадыш куд организаций ушнен. Икымше верым «ММЗ» АО-н коллективше, кокымшым «Йошкар-Олинская ТЭЦ-1» пашаеҥже-влак, кумшым «Акашево» чыве фабрикын командыже налыныт.