«Молодые профессионалы» (WorldSkills Russia) IX почылтшо регионанльный чемпионат уэш мастар ӱдыр-рвезе-влакым таҥасымашке чумырен. Тений тудо 1 мартыште Поволжский кугыжаныш техник университетыште торжественно почылто. Чылалан палыме амаллан кӧра участник-влак ончычсо семын ты кечын икте-весе дене вашлийын кертын огытыл, но вашла онлайн йӧн дене ужыныт, саламленыт.
Чемпионатын регионысо этапыштыже ты гана 290 еҥ шке вийжым терген. Тӱҥ составыште 1 гыч 5 март марте колледж ден техникумын студентше-влак да школышто тунемше-влак (юниор) таҥасеныт, а 10-12 мартыште «Навыки мудрых» этап лиеш, тушко 50 ияш деч кугурак-шамыч ушнат.
Тӱҥ составыште таҥасымаш 32 компетенцийыште эртен. Ончычсо семынак чоҥымо, медицине, программирований сфере-влак да калык дене пашам ыштыме тӱрлӧ профессий-влак ончыкталтыныт. Кок компетенций йӧршеш у: физкультур, спорт да фитнес (Оршанкысе шуко профилян колледжыште) да бухгалтер учёт (Марий радиомеханический техникумышто). Чемпионатым эртараш Йошкар-Оласе, Волжскысо, Козьмодемьянскысе да Звенигово район Чакмарийысе тунемме верлаште (чылаже 12 вере) площадке-влакым ямдылыме.
14-16 ияш-шамыч чемпионатыште юниор тӱшкаште шотлалтыт. Тений нуно Йошкар-Ола, Козьмодемьянск, Звенигово олаласе, Медведево посёлкысо, Семёновко селасе техникум ден колледжла гыч 40 ӱдыр-рвезе лийыныт, 6 тӱрлӧ компетенцийыште мастарлыкым ончыктеныт.
Эрик Козырев Звенигово район Изи Памъял ялыште шочын-кушкын, Кужмара кыдалаш школышто тунемын, кызыт Чакмарий селасе Транспорт-энергетике техникумышто 2-шо курсышто тунемеш, чоҥышо-каменщик профессийым налаш ямдылалтеш.
Рвезе кермычым оптымаште мастарлыкшым терген.
Диана Шабрикова:
– Кызыт мый Семёновко селасе верланыше 21-ше №-ан школышто 9-ше классыште тунемам. Урок деч вара арняште кум гана Йошкар-Оласе сервисный технологий техникумысо курсыш парикмахерлан тунемаш коштам. Тыштак мемнам Ворлдскилз чемпионатлан ямдыленыт. «Парикмахерское искусство» компетенцийыште заданийым ме таҥасымаш тӱҥалме деч 5 минут ончыч веле пален налынна. Тудым 3 шагатат пеле жапыште шуктыман. Ӱпым чиялтенна да причёскым ыштенна.
Таҥасымаште кызыт сеҥыше-влак регионысо сборныйыш логалыт да июльышто Уфаште эртаралтше Российысе чемпионатыште мастарлыкым ончыкташ тӱҥалыт.
– «Малярные и декоративные работы» компетенцийыште обойым пижыктыман, фрескым, навесым келыштарыман ыле. Тыште чылажымат правил-влакым шотыш налын, сӱрет почеш ыштыман. Ты компетенцийыште вӱдым да электроприборым кучылтыт, сандене эксперт-влак конкурсын йодмашыжым шуктымым чот тергат. Пашам пытарымеке, участник эсогыл электричествым чарен ок кай гынат, баллым шагалемдат. Такшым кажне ийын заданий-влак нелемыт, но тыгодым паша качестве эре саемеш гына, – каласкала «Малярные и декоративные работы» площадкыште тӱҥ эксперт Н.В.Речкина.
Фотошто: «Кондитерское дело» компетенцийыште таҥасыше-влак (шола гыч пурлашке): Е.Айглова (Марий Турек), Е.Волкова (Параньга), Б.Соловьёва (Советский район, Колянур), И.Михайлова (Волжский район, Чодраял), А.Пахомова (Козьмодемьянск).
