Пошкырт кундем Мишкан район Пӱнчер ялыште илыше, верысе школышто ынде шым ий музыкым, рисованийым, трудым, историйым да обществознанийым туныктышо Валентина Янгуатова чолгалыкшым пашаштыжат, моло аланыштат ончыкта.
Поро пашам ыштат
Самырык туныктышо Пӱнчер ялысе «Добрые сердца» волонтёр организацийым да школысо «Молодая Гвардия» отрядым вуйлата.
– 2019 ийыште, школышто волонтёр отрядым вияҥдаш манын, проект пашам возенна да «Добро не уходит на каникулы» Всероссийский конкурсышто грантым сеҥен налынна. Окса дене тӱрлӧ кӱлеш арверым наледенна. Кызыт 60 утла волонтёр мер толкыннан членже улеш. Школым тунем пытарымекыштат, иктаж мероприятийым эртараш кӱлеш гын, ончычсо тунемшем-влак эре полшаш толыт, – ойла В.Янгуатова.
Волонтёр движенийыш паспортым налмеке пуртат, но 5-ше классыште тунемше ӱдыр-рвезе-шамычат доброволец радамыш логалаш кумылыштым ончыктат. Туныктышо нуным колеш да ялыште, школышто тӱрлӧ сомылым ворандарыме пашаш уша. Тений, мутлан, чолга волонтёр-влак Кугу Отечественный сарыште сеҥымылан 80 ий теммылан пӧлеклалтше «Шарнымаш сад» акцийыш ушненыт. Школ воктене пызлым да облепихым ятыр шынденыт. Йоча-влак туныктышо да ава-ача-шамыч дене пырля СВО-н участникше-шамычлан шке коштымо сукарам, икмыняр мужыр меж носким, тӱрлӧ кочкышым да кӱлеш арверым поген колтеныт, маскироватлыме сеткым ямдыленыт.
Моторлыкым шочыкта
Валентина нерген шуко ойлаш лиеш. Тудо республикысе да Российысе молодежный да туныктымо форумлан, слётын участницыже. Спорт дене кылым куча, поснак волейболла модаш йӧрата. Марла мурен, куштен мошта. Валя нерген «уста еҥ чыла шотыштат уста» ой лач келшен толеш. Тудо эшежым кидмастар. Бисер дене герданым, кидшолым, вуйшовычым, автомашинаш аралтышым да молымат ышта. Пашаже-влакым йодмо почеш, интернет гоч, тӱрлӧ ярмиҥгаште ужала. Пеш чатка да мотор улыт. Кидмастар каласкала:
–Элла ден Арина ӱдырем-влак улыт. 12 ий ончыч Элла ӱдырем шочмеке, шке кид дене пидме, тӱрлымӧ шуын, тидын дене йочам эшеат чот чон шокшем шижеш манын шоненам. А вара бисер дене тӱрлӧ сӧрастарыме ӱзгарым утларак ышташ тӱҥалынам. Кызыт пашам-влак бисер гыч веле улыт.
Валентина Янгуатован пашаже-влак тӱня мучко шарленыт, манаш лиеш. Тудо 2017 ий октябрьыште Сочиште эртаралтше Самырык тукымын да студент-влакын XIX тӱнямбал фестивальыштышт участвоватлен. Тушко ятыр пашажым конден, утларакшым герданым ужален.
– Мый йодмо почеш чылажат индивидуально ыштем. Пошкырт кундемыште куштызо коллектив-влак согам, такиям ышташ йодыт. Тыршем заказым вашке шукташ. Тений Марий Самырык тукым слётышто лиймем годым ик ӱдырамашлан лу брелокым, герданым да кольем кок кечыште ямдылен шуктен кертынам. Йодшо-влак шукын улыт. Бисер герданем Россий да республике кӱкшытан фестивальлаште кугу уна, депутат-влаклан пӧлеклат. Мылам тидыже моткоч куанле.
Вконтакте «Для души – украшения и сувениры ручной работы» группем уло. Тушто пашам-влакым ужаш лиеш, – палдарыш кидмастар.
Еш альбом гыч налме фото-влак.