Кок йӧратыше еҥын палыме лиймыж нерген ятыр ӧрыктарыше историй колалтын, кинофильмлаштат тидын нерген шуко оҥай сӱретым ончыктат. Южгунам ӱдыр ден рвезе йӧршеш ойыртемалтше верыште вашлийыт, мутлан, Калашников автомат дене лӱйкалыме зачётышто.
Лач тыгай зачётышто Россий уголовно-исполнительный системын Марий Элысе управленийжын пашаеҥже-влак Алексей ден Анна Цветковмыт палыме лийыныт. Тунам нуно Россий ФСИН-ын Пермьысе институтыштыжо тунемыныт.
Угарман каче да Йошкар-Ола ӱдыр
Анна – Йошкар-Ола гыч. Ӱдыр изинек хореографий дене заниматлен, сымыктыш школын выпускник-отличникше лийын, школышто гуманитарно-правовой профилян классыште тунемын. Ятыр спорт мероприятийыштат школын чапшым арален. А куд ий ончыч Анна Беларусьышто эртаралтше Самырык пожарный-утарыше-влакын тӱнямбал слётыштышт Российын командыштыже лийын. Элнан сборныйжо чемпионын кубокшым сеҥен налын.
Ӱдыр правам аралыше структурышто пашам ышташ, погонан лияш изинек шонен, садлан школ деч вара ФСИН-ын ведомственный вузышкыжо тунемаш пурен. Сай физподготовкан медалисткылан тидым ышташ неле лийын огыл.
Тудо ийынак тиде вузыш Аннан ончыкылык пелашыже Алексей Цветков тунемаш пурен. Рвезе Угарман областьысе Вознесенское селаште шочын-кушкын. Тудо изинек спортлан шӱман кушкын, поснак волейболым йӧратен. РФ Герой А.Рожков лӱмеш кадетский школ-интернатым тунем пытарен. Алексейын ачаже Николай Владимирович – элгӧргӧ службын отставкысе капитанже, садлан могай профессийым ойыраш кӱлмым рвезе изинек пален.
Лӱйкалымаште палыме лийыныт
Институтышто курсант-влаклан чылажат у лийын: режим, коллектив, вер. Тунем шуаш жап кӱлын. Цветковмытын ойлымышт почеш, икымше курсышто нунын яра жапышт лийынат огыл. Но тунам Анна ден Алексей эше палыме лийын огытыл. Ик вузышто тӱрлӧ группышто (взводышто) шинчымашым погеныт. Палыме лиймышт нерген Анна каласкала:
– Институтыш тунемаш пурымеке, самырык боецын шкешотан курсшым эртыман, а вара иктешлыше норматив-влакым сдатлыман. Ик тыгай норматив – Калашников автомат дене лӱйкалымаш. Зачёт-влакым сдатлыме деч ончыч мый черле лийынам, садлан ятыр занятийыш коштын омыл. Лӱйкалымаш дене зачётым вес группо дене сдатлаш логалын. Полышым нигӧ деч йодаш – иктымат ом пале. А Лёша взвод командирын алмаштышыже лийын, йодмемлан полшен. Тиде кечым, 2018 ий 27 августым, пеш сайын шарнем.
Анна ден Алексейлан жапым пырля эртараш келшен. Тунемме деч вара вашлияш йӧным муаш тыршеныт, увольненийыште да каникулышто пырля лийыныт. Кумшо курсышто тунеммышт годым нуно ешым чумыраш шонен пыштеныт. 2021 ий февральыште Алексей Аннам тудлан марлан лекташ йодын.
– Тиде Йошкар-Олаште Изи Какшан эҥер воктене лийын. Йошкар-Олаш ача-авам дене пырля тылеч ончычат икмыняр гана толын коштынам ыле. Тиде олаште ончыкылык пелашем ила, илен-толын, шкежат тыште пашам ышташ тӱҥалам манын, тунам шоналтенат омыл, – манеш Алексей. – Йошкар-Олаште келша, вершӧр мотор, чыла лишнак. Марий Эл чодыралан да ерлан поян, пӱртӱсыш чӱчкыдын лектына.
Инспектор еш
Ӱдыр-каче курсант улмышт годымак, кеҥежым, сӱаным ыштеныт. Ончылно нуным эше ик тунемме ий, диплом паша вученыт. Распределений почеш Цветковмыт Марий Элысе УФСИН-ыш логалыныт: элгӧргӧ службо лейтенант Алексей Цветковым конвоирований шотышто пӧлкан инспекторжылан шогалтеныт, элгӧргӧ службо лейтенант Анна Цветковам – 7-ше номеран колоний поселений пелен исправительный рӱдерыште инспекторлан.
– Пырля пашам ыштыше коллегына-влак мемнам порын вашлийыныт, – ойлат вате-марий. Кеч могай йодыш дене нунын дек полышым йодын миенна гынат, эре полшеныт. Кугурак-влак деч шукылан тунемынна да кызытат тидым ыштена. Наставникна-влак нелылык годым эре полшат.
Конвоирований ден наряд-влак, занятий ден учений-шамыч – Алексей тидлан тунемын да службылан ямде лийын. Анна гын исправительный рӱдер нерген пешыже пален огыл. Вет уголовно-исполнительный системыште тыгай учреждений шукерте огыл почылтын, адакшым ӱдыр вес специальностьлан тунемын. Садлан тудлан, службыш толмекыже, сайынак ямдылалташыже пернен.
Цветковмытын ойлымышт почеш, ик ведомствыште служитлымышт нунылан каньыле гына. Кастене, мӧҥгышт толын, паша кечышт нерген кутырат, ваш-ваш каҥашым пуат. Эртыше шыжым, мутлан, Алексей «Виват, офицеры!» республикысе ведомственный конкурсыш ушнен. А Анна пелашыжлан усталык номерым ямдылаш полшен. Пырля тыршымышт арам лийын огыл – Алексей ик номинацийыште сеҥышыш лектын.
Службо деч яра жапыште Цветковмыт театрыш миен толыт, олан мотор верлажым ончен, йолын коштыт. Пошкудо регионлаш миен толыт, тыгак Сочи ден Санкт-Петербург олалам ончаш лӱмын миеныт. Лишыл жапыште Калининградым да Байкал ерым ужаш кайынешт.
Поро кумылан, илышлан куанен моштышо лейтенант еш ончыкылыклан кугу планым ышта: магистратурым тунем пытараш, икшыван лияш да нуным йол ӱмбак шогалташ. А эше – пӧртым чоҥаш да пушеҥгым шындаш. Пӧртышт йыр мотор пеледыш кушшаш – тидым ышташ фамилийышт йодеш.
А.Канатеев, Марий Элысе УФСИН-ын пресс-службыжо.
Фотом еш альбом гыч налме.