Алевтина Шернур посёлкысо эмлымверыште реанимаций отделенийыште пашам ышта. Тушко Шӱкшер ялже гыч йыр каяш гын, вич меҥге, вик корно дене 3,5 меҥге лиеш. «Ныл ораван транспортем уке гын, кок ораван дене пашашкем кудалышташ лачак веле. Велосипед дене 15-20 минут кудалман, телым 40 минут наре йолын ошкылман», – манеш тудо.
А.Шаблатова «Кугарня» газетым 2011 ий годсек лудеш. «Газетым почым – «Велосипедын озаже – Шернур велне» манын возымо. Мыяк огыл дыр манын шоналтышым. Статья мучашке ончальым гын, мыяк улам улмаш. Мариемын аваже Римма Сергеевна газетым лудаш пеш йӧрата. Мыйын пашаште улмем годым шергалынат шукта. Вара мыланем, ваштареш илыше вес шешкыжлан чыла каласкала. Газетым почо да ойла: «Аля, Шернур район Шӱкшер гыч ала-кӧ велосипедым модын налын». «Шоно, кӧ тыгай. Шешкыч», – манам. Вара армийыште служитлыше эргымлан йыҥгыртен каласышым. Тудат вигак ыш ӱшане. Пӧлеклан пеш куаненам. Газетыште такше чыла лудаш йӧратем. Еш нерген возымо, вара пытартыш лаштык пеш келшат», – мане Алевтина.
Фотошто: А.Шаблатова (пурла тӱырыштӧ) тулар-тулачыже Эсауловмыт дене пырля