26 апрельыште Марий филармонийыште Республикысе профсоюз ушемын «Люди труда» фестиваль-конкурсшым иктешлыме, пашаште ойыртемалтше еҥ-влакым палемдыме. Нунын радамыште туныктышо, врач, энергетике аланыште тыршыше, тӱвыра, чодыра озанлык, корно пашаеҥ да молат лийыныт.
Тыгай конкурсышто ондак ик номинаций гына лийын. Тений участник-влакым ныл номинаций почеш аклыме. Тиде «За созидание и долголетие в профессии», «Молодые профессионалы», «Стабильность – творчество –качество», «За преемственность поколений». Лауреат-влакым грамот, кубок-влак дене палемдыме. Залыште шинчыше-влаклан концертым ончыктымо.
Школышто 28 ий тырша
Звенигово район Кокшайск школышто тӱҥалтыш класслам туныктышо Наталья Юрьевна Антонова Тений «За созидание и долголетие в профессии» номинацийыште лауреат лӱмым сулен.
Тудо туныктымо аланыште 28 ий тырша. Эн ончыч Керебеляк, варажым Шемшӱргӧ школлаште пашам ыштен. Ешаҥмекыже, 2005 ийыште Кокшайск школын коллективышкыже ушнен. Тыгодым ятыр ий директорын туныктымо паша шотышто алмаштышыже лийын. Кызыт тыгак школышто Профсоз ушемын председательже.
Кокшайск школышто таче 70 наре йоча тунемеш, 17 туныктышо пашам ышта. Йоча-влакым Таир посёлко, Семёновка ял гыч автобус шупшыкта. Чёрное озеро посёлко, Липша, Юмбылак, Долгая Старица ялла гыч толшо икшыве-влак школ пеленысе интернатыште илат.
– Шкеже мый Какшамарий села гыч улам. Эн ондак Оршанке педучилищым, варажым Крупская лӱмеш Марий пединститутым тунем пытаренам.
Тынар ий туныктымо жапыште опыт погынен. Йоча-влакым йӧратет гын, пашам ышташ неле огыл. Чылаже вич выпускым луктынам. Тунемшем-влак тӱрлӧ конкурсышто, олипиадыште ойыртемалтыт.
Профсоюзын эртарыме сӱрет конкурсышкыжо кодшо ийын эргым дене пырля ушненна да лауреат лийынна ыле. Тений шке семын тышке толынам, – мане Н.Антонова.
Тале, опытан конструктор
Медведево район Упамаш ялеш шочын-кушшо Людмила Витальевна Долгорукова Йошкар-Олаште Марий машиностроительный заводышто 35 ий конструкторлан ышта. Марий политехнический институтым тунем лекмекыже, вигак заводышко пашаш каен. Таче тудо ик эн опытан да уста специалист. Пашаш толшо ятыр самырык еҥым наставник семын ты сомыллан туныкта.
35 ий жапыште Людмила Витальевна тӱрлӧ арверым лукмаште да нуным калык деке намиен шуктымаште тыршен. Конструктор пашан ойыртемже нерген тудо шуко каласкалыш:
–1987 ийыште заводыш толынам. Конструкторын пашаже моткоч оҥай да тыгодым куштылго огыл. Шонен лукмынам ме илышыш пуртышаш улына. Кызыт промышленностьым вияҥдаш технический специалист-влак огыт сите. Мутлан, конструктор, технолог, метролог да молат кӱлыт. Сандене кызыт премьер-министр тиде йодышым тарватен.
35 ий жапыште ме медицине техникым, кардиографым, ингаляторым, корно контроллёрым да молымат ыштенна. 2006 ийыште вуйлатыме пӧлкам светодиодный светильникым икымше гана ышташ тӱҥалын. Тыгай годым тудым ямдылаш огыл, а еҥ-влаклан налаш ӱшандараш неле лийын. Тӱҥалтыште шукын тыгай лампе верч тореш лийыныт, шерге манше-влакшат улыт ыле. Тудын пайдалыкшым шукын умылен огытыл. Конструктор шонен лукшаш, вара сатум рынок марте намиен шуктышаш.
Заводын ик эн неле жапшылан 1997 ийым шотлем. Тунам митинг, шествий-влак лиеденыт. Пашазе-влаклан идалык дене пашадарым тӱлен огытыл. Ме ты неле жапым илен лектынна да заводым арален кертынна, вет тунам шуко завод пытыш.
Таче вуйлатыме бригадыштем 12 еҥ тырша. Самырык еҥ-влак ятырын улыт. Нуным ме пашалан туныктена.
Школым тунем пытарыше ӱдыр-рвезе-влаклан иктым ойлем: технический специальностьым налаш ида лӱд, тунем пытарымеке, тыланда паша вер лектеш. Кызытсе жапыште тыгай специалист-влак пеш кӱлешан улыт, – мане Людмила Витальевна.
Ик профессийыште тукым дене ыштыше куд участникым палемдыме. Нунын коклаште медициныште, чодыра пашаште да туныктымо аланыше тыршыше специалист-влак улыт. Тушеч иктыже, Шернур район Койсола гыч Анисимовмыт тукымышто, туныктымо стаж 177 ийыш погына. Нунын нерген газетнан лишыл номерыштыже лудса.
Фестиваль-конкурсыш виян, тале, шке пашам йӧратыше, опытан специалист-влак чумыргеныт. Кажныжын – шке илыш корныжо, ойыртемалтше пашаже да лектышыже. Тыгай пашаче-влакым пагалыман да нунын деч примерым налман.