Марий Элыште шурным поген налме тургым мучашлалтеш.
370 тӱжем тонн пырчым йоҥыштымо. Ӱмашсе дене таҥастарымаште тиде 87 тӱжем тоннлан шукырак. Пырчан культурын лектышыже – гектар гыч 27 центнер (2024 ий дене таҥастарымаште гектар гыч 6 центнерлан шукырак).
Ялозанлык предприятий ден фермер озанлык-влак пареҥгым луктын пытареныт: лектыш – 75,2 тӱжем тонн. 78 тӱжем тонн моло пакчасаскамат поген налыныт:
Кургым ямдылыме планым темыме. Озанлык-влак кокияшым 44,8 тӱжем гектар кумдыкышто ӱденыт. Пасулаште кызыт кукурузым поген налыт.
Марий Элым Вуйлатышын пресс-службыжын колтымо фотожо.