Кундемыштына СВО участник-влаклан пашаш пураш полшат. Тидын шотышто Марий Элысе Правительствыште каҥашеныт.
Марий Элым Вуйлатыше Юрий Зайцевын палемдымыж почеш, специальный военный операций гыч герой-влакым вашлияш кызытак ямдылалтман. Нунын ончыкылык пашашт нергенат йодышым ончылгоч рашемдыман. Кундемыштына «Герои Марий Эл. Талешке-влак» программе илышыш шыҥдаралтеш, но тӱрлӧ амаллан кӧра тушко чыланже гаяк логалын огыт керт. Садлан кажне гаяк ветеранлан полшыман. Тидым пашам пуышо организаций да вуйлатыше-шамычланат шотышто кучыман.
Тачысе кечылан кундемыштына СВО гыч пӧртылшӧ 75 процент ветеран пашам ышта, молышт реабилитацийым эртат але пашам кычалыт.