Пашам аклен, умбакыжат вуйлаташ ÿшаненыт

 

Теҥгече Йошкар-Олаште Российысе военно-исторический обществын (РВИО) марий кундемысе пöлкажын погынымашыже эртен.

Тÿҥ йодыш – вуйлатышым сайлымаш. Але марте тудым кок ийлан ик гана ойыреныт гын, ынде кум ийлан ик гана сайлаш тÿҥалыт. Российысе обществым вуйлатыше Владимир Мединскийын темлымыжым шотыш налын, погынымаште лийше-влак ик йÿк дене республикысе РВИО председательлан Марий Эл правительстве вуйлатышын икымше алмаштышыже Евгений Кузьминым сайленыт. Исполком вуйлатышылан Чарла Кремльын директоржо Никита Черныйым ойырымо.

РВИО-н кундемысе пöлкажын Попечительский советшым Марий Эл вуйлатыше Юрий Зайцевлан вуйлаташ ÿшаныме.

Погынымаште тыгак пытартыш кок ийыште ыштыме пашам иктешлыме, ончыкылан планым палемдыме.