Марий Элыште 1 сентябрь гыч педагог-влакын окладышт 15 процентлан кушкеш. Тидын нерген ойлен республикым Вуйлатыше Ю.Зайцев «Йӱлам арален, ончыкылыкым чоҥена» августысо форумыштышт.
Тений форумышто Марий Эл гыч веле огыл, тыгак Запорожский область гычат педагог-влак лийыныт.
Ю.Зайцев образований аланыште шумо кӱкшыт нерген ойлен да палемден: республикысе 22 школышто «Точка роста» рӱдер-влак почылтыт, йоча-влаклан «Кванториум» технопарк, талантан йоча-влаклан полшышо «Волгенче» рӱдер пашам ышташ тӱҥалыт. Тыгак Марий Элыште кызыт ныл у школ чоҥалтеш. «Модернизация школьных систем образования» федеральный программылан келшышын, тений 10 муниципальный образованийыште 13 школым капитально олмыктымо. Нине пашалан 850 млн наре теҥгем кучылтмо. Республикысе бюджет гыч ойырымо ешартыш 9 млн наре теҥгем олмыктымо школ-влак кумдыкым шотыш кондымо пашалан колтымо. Марий Эл Республикысе Правительстве тыгак 39 млн наре теҥгем колледж ден техникумлаште леведышым олмыкташ ойырен.
Ю.Зайцев самырык-влакын чолга улмышт нерген ойлен да нунын военнослужащий-влаклан полшымо акцийлаштым: посылкым погымо, шокшо вургемым ургымо, маскировочный сеткым пидме пашаш ушнымыштым – палемден.
– Россий Президент Владимир Владимирович Путин 2023 ийым Туныктышын да наставникын идалыкышт семын увертарен. Тидыже шке жапыштым да вийыштым йоча-влаклан пӧлеклыше еҥ-влакын пашаштлан тӱткышым ойырымо дене кылдалтын. 1 сентябрь гыч педагог-влаклан должностной окладым 15 процентлан кугемдена. Регионысо туныктымо системыште тыршыше командын паша лектышыжым сайлан шотлем, – ойлен Ю.Зайцев.
Тудо Запорожский область Куйбышевский районышто туныктымо тӧнежлаште ыштыме паша нергенат каласен коден да неле условийыште ыштыме пашаштлан педагог-влаклан тауштен.
Д.Речкинын фотожо.