Пашаче профессийлан – самырык вий

17-21 февральыште республикыштына «Молодые профессионалы (Worldskills Russia)» VIII чемпионатын регионысо этапше эртаралтын.

Чемпионатыш кокымшо ий почела тÿрлö моло кундем гыч участник-влак толыныт. Тений участник ден эксперт-влак Татарстан, Удмуртий, Чуваший респубикыла, Уляновск область, Моско да Санкт-Петербург ола-влак да моло кундемла гычат лийыныт. Нуно 12 площадкыште пашам ыштеныт. Чемпионатын тÿҥ этапыштыже тÿрлö ийготан группо-влак таҥасеныт: 14-16 ияш, 16-22 ияш-влак. Тыгак 26-28 февральыште 50 ияш деч кугурак-влаклан «Навыки мудрых» чемпионат эртаралтеш. Тыште эксперт, мастер-влакат участвоватлат. Тений нуно 4 компетенцийыште таҥасат. Эртыше этапыште изирак ийготан (юниор)-влак 6, а кыдалаш ийготан-шамыч 31 тÿрлö компетенцийыште мастарлыкыштым ончыктеныт. Чылаже 310 наре студент ден тунемше таҥасеныт. Нунын пашаштым 320 эксперт аклен.

 

Наталья Васильевна Адамова, Марий Элысе образований да науко министр:

– Тачысе кечылан Worldskills толкыным профессиональный образований системым вияҥден колтымаште ик эн кÿлешан механизмлан шотлаш лиеш. Мемнан республикына ты толкыныш ушнышо икымше регион-влак коклаште лийын. Таче марте ме моткоч шуко материально-технический базым саемденна, а мемнан участникна-влак национальный чемпионатлаште участвоватлат.

 

 

Торгово-технологический колледжыште 4 площадке пашам ыштен. Тыште ÿдыр-рвезе-влак повар паша, кондитер паша, ресторан сервис да отель-влакым администрироватлыме шотышто таҥасеныт.

– Участник-влак кум кече жапыште тÿрлö сомылым шуктеныт. Икымше кечын кафеште, кокымшо кечын барыште унам кузе чын ончен колтымо шотыто моштымашыштым тергыме. Ресторан пашан – шке ойыртемже. Мутлан, ÿстелым чын погыман, кофем, коктейльым тÿрлö семын, но чын ыштен моштыман. Чыла йодмаш тÿнямбалсе правил-влак дене икгай, – ойла регионысо чемпионатын «Ресторанный сервис» компетенцийыште тÿҥ экспертше Е.А.Дорофеева.

 

 

 

Даша Мосунова Йошкар-Оласе торгово-технологический колледжыште гостиничный паша направлений дене тунемеш. Рÿдоласе «Ревизор» унагудышто пашам ышта. Конкурсышто кокымшо ий почела мастарлыкшым ончыктен. «Ӱмаште 2-шо верым налынам, тений шöртньö медаль верч тыршем» – мане ÿдыр.

 

 

 

 Ольга Леонидовна Гладышева, кермычым оптымаш компетенцийын тÿҥ экспертше:

– Йошкар-Оласе строительный техникум Worldskills чемпионат эртаралташ тÿҥалме икымше ий гычак ик эн тÿҥ площадкыш савырнен. Тений тыште икмыняр конкурсный вер лийын. Участник-влак коҥгам оптымо пашам ончыктеныт, кермыч дене пырдыжым оптеныт, плитке дене облицовкым ыштеныт сантехнике ден отоплений, малярный да декоративный паша, рекрутер сомылым шуктеныт. Кермычым оптымаште, тыгак сантехнике да отоплений пашаште школышто тунемше-влакат лийыныт.

Мемнан тунемшына-влак кум гана тÿнямбалысе чемпионатыштат мастарлыкыштым ончыктат. Икманаш, ме тунемше-влаклан тÿнямбалысе стандартлан келшен толшо шинчымашым пуэна.

Александра Дмитриева Звенигово районысо Петла (Иркино) ялыште шочын-кушкын, Чакмарий школышто тунемын. Кызыт Йошкар-Оласе строительный техникукмышто мланде да имущество паша шотышто вашкыл специалистлан тунемеш.

– Мый рекрутер паша шотышто компетенцийыште участвоватлем. Конкурс жапыште ме предприниматель сомылым ончыктена, интернет гоч пашаеҥ-влакым кычалына, а вара ойырен налме еҥ дене собеседованийым эртарена да тудым пашаш налаш але укем рашемдена. Мылам рекрутер паша оҥайын чучеш. Но техникумышто ты сомылан огыт туныкто, садлан шке семын ямдылалташ логалын. Такшым илышыште келшен толшо пашаеҥым кычалын моштымем кÿлеш лиеш манын шонем.

 

Йошкар-Оласе медицине колледжыште тунемше-влак «Медицине да социальный полыш» компетенцийыште таҥасеныт. Нунылан кандаш модульым келыштарыме лийын. Кажне вере конкурсышто пуалтше заданийым чын  шуктымым тергеныт. Мутлан, икымше зонышто инсульт дене эмганыше пациентым чын ончыман, йол луэш операцийым ыштыме деч вара еҥым кÿлеш семын эмлыман улмаш. Вес зонышто кечывал стационарыште сакар диабетан пациентын йолгопаже дене пашам ыштыман. Пациент-влак чынже денак черле еҥ лийын огытыл.

Таҥасымаш деч посна чемпионат годым тÿрлö мастер-клас, семинар-влак эртаралтыныт. Тушто тунемме учрежденийласе, министерстве ден ведомствыласе пашаеҥ-шамыч Марий Элыште кадр-влак шотышто могай тÿрлö йодыш улмым каҥашеныт. Тыгак чемпионат жапыште школышто тунемше-влаклан профессийым ойырен налме шотышто вашлиймаш-шамыч лийыныт.

Чемпионатыште сеҥыше-влакын лÿмышт таче пале лиеш. Нуно регионысо сборныйыш логалыт да тений майыште Новокузнецк олаште эртаралтше «Молодые профиссоналы» чемпионатыш каят.