И.С.Палантай лӱмеш тӱвыра да сымыктыш колледжын Калыкле сымыктыш гимназийже (ондак талантан йоча-влаклан музыкально-художественный школ-интернат маналтын) ятыр уста да талантан тунемшым иктеш чумыра. Тыште ончыкылык музыкант, сӱретче, куштызо, мурызо-влак тунемыт. Советский район Кӧрдемтӱр ялын шочшыжо Надежда Аркадьевна Воронцова тыште ынде 40 ий воспитательлан пашам ышта.
Шуко тунемшылан тудо кокымшо ава гай лийын шуктен, кажныжым умылен мошта. Йоча-влакым тӱткын эскера, ыштышаш пашаштым терга, кӱлеш годым полышкала, арулыкым кучаш туныкта да тӱрлӧ мероприятийым эртара.
Тынар ий ыштыме жапыште Надежда Аркадьевна шуко чапкагаз дене палемдалтын. Тений октябрьыште тудо эн кугу наградым – Российысе Просвещений министерствын Почётан грамотыжым – налын.
Йоча-влакым йӧратыман
Надежда Аркадьевна школышто тунеммыж годымак йоча-влак дене пашам ышташ йӧратен. Сандене тудо Н.Крупская лӱмеш Марий пединститутышко руш филологлан тунемаш пурен. Дипломым налмеке, талантан йоча-влаклан музыкально-художественный школ-интернатыште воспитательлан ышташ тӱҥалын, кугу пагалымашым сулен. Кызыт 9 «А» музыкальный классым вуйлата.
– Мый шым классым луктынам. Тушто сӱретче, куштызо, мурызо-влак тунемыныт. Ынде музыкальный классым кокымшо гана вуйлатем. Мыняр тыршем, иктым умылем: тышке толшо шуко йочалан мастарлык шочмекак пуалтын. Нуным вияҥдаш гына кӱлеш. А южо йоча ача-аван темлымышт почеш гына тышке толеш.
Гимназийыште йоча-влак кок программе почеш тунемыт. Эрдене школысо программе почеш шинчымашым налыт гын, кечывал деч вара – шке направлений дене. Кажне йоча посна направлений дене шке семын ямдылалтеш. Ты пашам кузе шуктымыштым терген лектам. Йоча-шамыч мӧҥгысӧ пашам огыт умыло гын, ава семын порын, ласкан умылтараш тыршем.
Тыште илыш шолеш, ик верыште огына шого. Ме тӱрлӧ мероприятийым эртарена, вашлиймашке, ончерлашке, спектакльлашке лектын коштына, конкурслан ямдылалтына.
Воспитательын пашаже мыланем келша. Тӱҥжӧ – йоча-влакым йӧратыман, кумылыштым налын моштыман, но тыгодым шкем пеҥгыдын кучаш тыршыман. Шуко жап тыште ыштымек, психолог гай лийын шуктенам. Ик ончалтыш гычак йочан койышыжым умылаш лиеш.
Мый тыгай ой-каҥашым пуынем: ача-ава-влак шочшыштым гимназийыш тунемаш колташ шонат гын, тидлан икшывым ончылгоч ямдылышаш улыт. Йоча ача-ава деч посна илаш тӱҥалеш. Сандене шкем шот дене, арун кучаш тунемшаш, порядкым палышаш, – мане Н.Воронцова.
2023 ийым Российыште Туныктышын да наставникын идалыкышт манын лӱмдымӧ. Надежда Воронцова ятыр самырык специалистын наставникше лийын, профессионально мастарлыкым нӧлташ кугун полшен.
Тудын шуко выпускникше илышыште шке верым муын, палыме еҥ лийын. Нунын кокла гыч Вадим Красновым, Светлана Яндуковам, Аксар Эльтемеровым, Павел Анисимовым, Регина Денисовам, Ирина Балуевам да молымат палемдаш лиеш. А кызыт 9 ноябрьыште сӱретче Ирина Балуеван Йошкар-Олаште выставкыже почылтын.
Сеҥымашышт ятыр
Надежда Аркадьевна тӱрлӧ конкурсыш ушна да сеҥышыш лектеш. Тидын годым ятыр сценарийым, статьям воза, тӱрлӧ конференцийыш коштеш. Тунемше-влакымат тыгаяк чолга лияш тарата. Йоча-влак сеҥымаш дене чӱчкыдын куандарат. Проект пашамат талын возат. Кодшо ийын «Салтаклан серыш» республикысе конкурсышто Диана Ямайкина 1-ше верым налын. Тыгак Надежда Аркадьевна йоча-влакым ырес дене тӱрлаш туныкта. Кызыт республикыште эртыше регион-влак кокласе «Живые ремесла» конкурсышто 8-ше классыште тунемше Алёна Пономарёва 1-ше верым налын.
Российысе Просвещений министерствын пуымо Почётан грамотыжым Надежда Аркадьевна таче ик эн кугу сеҥымаш семын палемда. Тудын пашажым кӱкшын аклыме. Тидыже ончыко каяш куатым ешара, илышыште пеҥгыдын шогаш ӱшаным пуа.
Н.Воронцова ик эргым ончен куштен, илыш корныш луктын. Тудо аван ик эн кугу ӱшанле эҥертышыже, чонкуанже. Никита эргыже армийыште служитлымыж годымак вигак СВО-шко логалын.
Надежда Аркадьевналан ончыкыжымат тыгаяк чолга, тале лийын кодаш да сеҥымашке эре шуаш тыланена.
