20-23 апрельыште республикыштына «Идалыкын туныктышыжо», «Идалыкын воспитательже» да «Марий йылмым эн сайын туныктышо» конкурс-влак эртаралтыныт. Конкурс годым кундемнан тӱрлӧ школжо гыч туныктышо ден воспитатель-влак (чылаже 39 еҥ) шке паша мастарлыкышт дене палдареныт. Конкурс Советский посёлкысо 3-шо №-ан школышто эртаралтын.
«Идалыкын туныктышыжо-2021» лӱм верч тений 15 туныктышо таҥасен. Нуно кокла ийготан йоча-влак дене методический семинарым, мастер-классым эртареныт. Тылеч посна урок деч ӧрдыжтӧ шуктымо сомылышт да проект пашашт дене палдареныт. А эн тале-влак «йыргешке ӱстел» сынан вашлиймаште жюрин да «Идалыкын туныктышыжо» конкурсышто тылеч ончыч сеҥыше-влакын йодышыштлан вашештеныт. Тыге, эн тале туныктышын лӱмжым Медведево район Краснооктябрьский школышто тӱҥалтыш класслам туныктышо Елена Николаевна Романова сулен. Тений тудо Ростов-на-Дону олаште эртаралтше Российысе конкурсышто Марий Элын чапшым аралаш тӱҥалеш.
2021 ийын эн сай воспитательже – Волжск оласе 17-ше номеран «Дюймовочка» йочасадыште пашам ыштыше Юлия Анатольевна Белоусова. А марий йылме дене эн сай туныктышо лӱм верч 8 еҥ таҥасен. Эн уста, эн мастар туныктышо семын Морко посёлкысо 2-шо номеран школышто пашам ыштыше Надежда Александровна Голубкина палемдалтын.
– Шернур район Кожласола ялыште шочын-кушкынам, Марисола кыдалаш школым тунем пытаренам. Шочмо йылмым йӧраташ Зинаида Васильевна Ермакова туныктен, тудлан моткоч кугу таум каласем… Илыш пӱрымашем Морко кундемыш кондыш. Ончыч Кугу Кожлаял школышто марий йылме ден литературым туныктенам, 2006 ий гыч Морко посёлкысо 2-шо номеран школышто марий йылмым кугыжаныш йылме семын туныктем. Тыгак директорын воспитатлыме шотышто алмаштышыже улам, – ойлыш шкеж нерген Надежда Александровна.
Н.А.Голубкина марий йылмым туныктышо-влаклан эртаралтше республикысе конкурсышто тылеч ончычат вийжым терген, эсогыл финалышкат логалын. Туныктышын ойлымыж почеш, тыгай таҥасымаш паша лектышым моло туныктышо-влакын пашашт дене таҥастараш, вийым тергаш йӧным пуа. «Ты гана конкурс нелын чучо але уке?» йодышлан туныктышо тыгерак вашештыш:
– Марий йылмым кугыжаныш йылме семын туныктымо урокым Советский район Алексеевский школышто эртаренам. Йоча-влак мылам йӧршеш палыдыме лийыныт. Нунын марла умылымышт, мутланен моштымышт шотышто изишак тургыжланенам. Но чыла сайынак эртыш. Урок деч ӧрдыжысӧ пашам руш йоча-влаклан эртаренам, тудо Марий талешке кечылан пӧлеклалтын. Тудат куштылгын чучын. А «Марий йылме уроклаште модульный заданий-влакым кучылтмаш» темылан пӧлеклалтше мастер-классым ончыкташ эн куштылгын чучо.
– Марий йылмым туныктышо-влаклан чолгалыкым тыланем. Шочмо йылмын кӱлешлыкшым паша надырда дене ончыкташ тыршыза. Ме шке йылмынам йӧратен, икшыве-влакын изи чонышкышт тиде кумылым шыҥдарен шогышаш улына!
Надежда Александровна тений шочмо йылме дене туныктышо-влаклан эртаралтше Россий таҥасымаште республикнан чапшым аралаш тӱҥалеш. Уста туныктышылан ончыкыжымат сай паша лектышым, у кӱкшытым да сеҥымаш-влакым тыланена.
Фотом Н.Голубкинан
альбомжо гыч налме.