Марий Эл вуйлатышын пашажым жаплан шуктышо Юрий Зайцев республикысе СМИ пашаеҥ-влак дене вашлийын, журналист-влакын пашаштлан кӱкшӧ акым пуэн.
Ю.Зайцев республикысе илыш нерген телевидений гоч пален налаш тырша, тыгак социальный кыллаште, телеграм-каналыште уверым эскера.
‒ Социальный сеть гоч ыштыме пашам ончыкташ, шке шонымаш дене палдараш, калык дене кылым кучаш лиеш. Мый тушто еҥ-влакын возымо комментарийыштым эреак лудам, ‒ манын тудо.
«Республикыште эн ончыч мо тыланда ӧрыктарышын, куандарышын койын?» йодышлан тыгерак вашештен:
‒ Пӱртӱс тыште поснак мотор. Мый кумда степь кундем гыч толынам. А тыште чодыра, сылне ер-влак вигак шинчаш пернат. Чодыра пожар олмым чоҥештен ончен савырныме годым яндар вӱдан вер, моло пӱртӱс моторлык утларак палдырнен. Марий Элыште илыше-влакын пеш поро кумылан улмышт шижалтеш. Эртыше Пеледыш пайрем годым тиде поснак койо. Кинде-шинчал, мелнам тамлен, пу ате гыч темен йӱктымӧ пура дене сийлымаш калыкын ойыртемжым почын ончыкта. Марий койышлан келшыше волгыдо тувыр-йолаш, кочкыш йӱла ойыртем шке кӧргӧ чон поянлыкым аралымым пеҥгыдемда.
Юрий Викторович дене ваш ужын мутланымеке, теве мо утларак рашеме: айдеме чылажымат сӧрымӧ дене огыл, а паша лектыш дене вискала. «Кузе калыкын ӱшанжым сулаш шонеда?» йодышлан тыгай вашмутым пуыш:
‒ Сӧрымӧ мутым шуктыман, тунам гына калык айдемылан ӱшана. Ыштыме паша койшаш, лектышан лийшаш. Тыгай принцип дене мый тыршем.
Ончыкылык шонымашыж нерген ойлышыжла, Юрий Зайцев федеральный программе, национальный проект дене шуко ышташ кӱлмым палемдыш. А тӱҥжӧ республикыште лектын шогышо йодыш-влакым палыман да решатлыман, манеш. Калык корным йодеш гын, тугеже тудо лийшаш.
Вашлиймаште СМИ-лан пашаеҥым ситарыме йодышын пӱсӧ улмыжым палдарыме, пашадарым кӱзыктымӧ да моло йодышымат тарватыме.
Э.Иманаев.