22-28 апрель – Паша верлаште тазалыкым пеҥгыдемдыме эн сай практикым шаркалыме арня (Пашам аралыме тӱнямбал кече вашеш).
Корпоративный практикын пайдаже нерген Марий Элысе Калык тазалык да медицине профилактике рӱдер вуйлатышын алмаштышыже Н.Блошенко умылтара.
Еҥ-влакын тазалыкыштым аралыме шотышто ик эн тӱҥ направленийлан предприятийлаште корпоративный программе-влакым шыҥдарымым шотлыман. Тиде пижедылше огыл чер-влаклан: инфаркт, инсульт, сакыр диабет, онкологий – вияҥашышт чаракым ыштыше тӱрлӧ фактор шотышто профилактике проект-влак, тазалыклан эҥгекым кондышо койыш деч утлымаш.
Марий Элысе Тазалыкым аралыме министерстве республикысе кугу предприятий вуйлатыше-шамыч коклаште корпоративный программым ямдылыме шотышто умылтарыме да организационно-методический пашам шуктен шога.
Кызыт Йошкар-Оласе 1-ше №-ан Медсанчастьын персоналже дене пырля Марий машиностроительный заводын пашаеҥже-влакын тазалыкыштым пеҥгыдемдыше корпоративный программым илышыш шыҥдарыме. Ты программе пашаеҥ-влакын тазалыкыштым пеҥгыдемда, таза илыш-йӱлам кучаш кумылаҥда веле огыл, тыгак уда койыш деч утлаш тарата, физический активностьым вияҥда, стрессым шагалемдаш, таза кочкышым кочкаш да шке тазалыкым перегаш полша.
Активист-влакын молодёжный группышт паша верыште тамакым шупшмым чарыме правилым шуктымым терга, еҥ-шамычым ты уда койыш деч утлаш тарата, тыгак самырык-влакым наркотик дене пайдаланыме, кочывӱдым йӱмӧ да тамакым шупшмо деч кораҥаш кумылаҥда.
Тамакын, кочывӱдын тазалыклан эҥгекым ыштымышт, таза илыш-йӱлам кучымо нерген информационный материалым еҥ-шамыч погынымо пӧлемлаште вераҥдыме. Тидын нерген предприятийын локальный радиосетьлаж гочат палдарат да заводын «Новатор» газетыштыжат возат. Шошым да кеҥежым пудий энцефалит шотышто профилактикым эртарат, «Узнай свой ВИЧ-статус» акций кажне ийын лиеш.
Заводышто тренажёрный зал (тӱшка занятийлам эртараш посна пӧлем-шамыч улыт) пашам ышта. Пашаеҥ-влаклан Йошкар-Оласе тазалыкым пеҥгыдемдыме ик комплексыш, бассейныш, фитнес-рӱдерыш, спортзалыш кошташышт 130 абонементым ойырымо. Паша смене годым график почеш лӱмын гимнастикым эртарат. ММЗ пашаеҥ-влак ончыкыжым, сборный командылаш (пӧръеҥ, ӱдырамаш, ветеран командыла) чумырген, волейбол, футбол, иймаш, ӱстембал теннис да моло вид дене таҥасымашлаш ушнаш шонат. Донор семын вӱрым пуаш кумылаҥдыше мероприятий-шамычымат эртарат.
Кугурак ийготан, тыгак тазалыклан эҥгекым кондышо але лӱдыкшӧ производственный факторан сомылым шуктышо пашаеҥ-влакым санаторно-курортный эмлымашке колтат.
Марий Элысе тазалыкым аралыме министерствын архивше гыч налме фото.